St. Maarten Entrepreneurship Development Center (SEDC) lo lansa AI for Small Business (AI pa Negoshi Chiki), un programa di entrenamento di cuater siman diseña pa yuda e micro, chikito y mediano empresanan local (MSME) desaroya habilidadnan practico di inteligencia artificial. E programa lo cora di 19 di october te cu 16 di november 2026, cu sesionnan riba dialuna, diaranson y diahuebs di 7:00 PM te cu 9:00 PM. SEDC ta ehecuta e programa aki via e Ministerio di TEATT, financia pa TWO bou di e Paquete di Pais E6 maneha pa RVO.
SEDC a contrata e servicionan di Ife Badejo pa diseña y duna e programa AI for Small Business. Ife Badejo ta un di e Embahadornan di AI di Sint Maarten y ta Fundador y CEO di Islandpreneur International. Badejo a entrena mas di 400 profesional den AI den e region di Caribe durante e ultimo aña, como parti di un trabou di mas di un decada den educacion di emprendemento y AI den e region.
Durante 12 sesion, un maximo di 20 doño di negoshi lo pasa di identifica unda AI ta encaša den nan negoshi pa traha un flujo di trabou (workflow) operacional impulsa pa AI, un estrategia di crecemento di AI, un politica di AI, y un mapa di ruta personalisa di 90 dia pa implementacion. E curiculo ta inclui tambe instruccion dedica riba proteccion di dato, privacidad y e uzo responsabel di AI.
“Doñonan di negoshi chiki akinan ta uza AI, pero mayoria no ta optimis’e den un manera cu ta impulsa e crecemento di nan negoshi,” Badejo a bisa. “E programa aki ta duna nan e hermentnan pa haci esaki den cuater siman, uzando nan mesun negoshi como caso di estudio — no un curso generico.”
E participantenan lo termina e programa cu un flujo di trabou activo impulsa pa AI, un estrategia di crecemento di AI y un mapa di e trayecto di e cliente, un politica di AI simpel, un Mapa di Ruta personalisa di 90 Dia pa Implementacion di AI, un guia practico di herment y recurso, un red di colega, y un Certificado di Finalisacion.
Registracion pa AI for Small Business ta habri awor. Doñonan di negoshi existente cu ta intresá den e programa di AI for Small Business por aplica na tinyurl.com/sedc-ai o contacta SEDC na admin@sedc.sx.
Tocante SEDC
E St. Maarten Entrepreneurship Development Center a wordo lansa pa e Ministerio di Turismo, Asuntonan Economico, Transporte y Telecomunicacion den 2023 pa duna un structura sostenibel pa e desaroyo di emprendemento na Sint Maarten, ofreciendo servicionan di conseho pa negoshi, programanan di incubacion, entrenamento, taller y asistencia tecnico.