En conexion cu e Siman Mundial di Conscientisacion di FTD: (Fronto TemporaL Disorder),Fundacion Alzheimer Aruba ta lansa un iniciativa publico vital pa kibra e silencio rond di e Fronto TemporaL Disorder (FTD) aki. Pero kico ta FTD? FTD ta para pa Trastornonan di algun funcion nan den e cerebro situa na e parti dilanti (“Frontal”)di e cabes y na banda (“Temporal”) di e orea.
Hopi hende -te ainda- tin e pensamento robes cu tur forma di deterioro cognitivo ta malesa di Alzheimer y/of De-mencia (termino cu poco poco lo disparse). Sinembargo, FTD no ta Alzheimer, pero a lo largo, den edadnan avansa e lo por desaroya pa e malesa degenerativo di Alzheimer y a lo largo causa problema di entreotro memoria.
Mientras cu e malesa di Alzheimer ta afecta principalmente e memoria na un edad avansa, riba 60 aña, FTD ta afecta specificamente e seccion frontal y temporal (dilanti y na banda di e cerebro) y ocasiona cambionan drastico den e comportacion, conducta social, personalidad y e abilidad di idioma/lenguahe di un persona. Mas ainda, FTD ta e trastorno di mas comun cerca personanan bou di 60 aña di edad, afectando hopi biaha hende den e miho etapa di nan bida, carera, funcionamento y famia.
Pasobra cu FTD ta manifesta su mes na un edad mas hoben, e prome sintomanan di comportacion lamentablemente ta wordo confundi cu, entre otro, depresion cronico, burnout structural, problemanan psikiatrico of crisis di edad medio (‘midlife crisis’), tin biaha cu diagnosis eroneo.
FTD ta un termino general cu ta encera varios condicion neurodegenerativo (pues NO curable)y genético, di e variacion den comportacion cu ta afecta, entre otro, empatia social, te cu lenguahe cu ta kita e capacidad di un persona pa comunica na un manera coherente.
Pa yuda famia, trahadonan den cuido di salud y e comunidad di Aruba reconoce, compronde y maneha e condicionnan compleho aki, Fundacion Alzheimer Aruba ta organisa un anochi informativo y educativo pa asina no tin cu pasa den incertidumbre, wordo manda di cashi pa muraya y sigi warda te ora e condicion a empeora di tal manera cu aparantemente cu nada mas por haci.
Tambe F.A.A. ta duna e posibilidad di haci un ’second opinion’ pa kita e duda cu lo por tin un diagnosis eroneo (‘misdiagnose’).
Tocante Fundacion Alzheimer Aruba: Fundacion Alzheimer Aruba (F.A.A.) ta un organisacion sin fin di lucro dedica na aumenta conscientisacion, brinda educacion publico, y ofrece guia y recurso continuo na personanan cu ta biba cu condicionnan tanto reversibel como ireversibel , nan cuidadornan y nan famia.
Fuera di esaki conhuntamente cu instancia ruman “Neuropsychological Ambulatory Aruba” (N.A.A. desde 1991) e posibilidad di yega na un segundo opinion ora ta trata di un diagnosis neurocognitivo insigur. Recientemente F.A.A. ta forma parti di e organisacion Pashentnan Di Aruba (PDA) cu ta boga pa derecho, trato digno y confiabel di pashent.
Bo ta cordialmente invita na e Charla: “Descubriendo e Misterionan di Trastornonan Frontotemporal (FTD di e cerebro)
Fecha: Diaranson, 30 di September 2026
• Ora: 7:00 PM – 9:00 PM
• Sitio: Biblioteca Nacional, San Nicolas
• Entrada: Totalmente Gratis
Oradornan Experto Invita:
• Dr. Jayburtt Dijkhoff (PDA) – Representando Pashentnan di Aruba
• Drs. Melva Croes-Yánez (F.A.A.) – Representando Fundacion Alzheimer Aruba
Fundacion Alzheimer Aruba ta invita cordialmente tur cuidador, profesional di cuido, studiante y publico en general pa asisti na e charla educativo aki. Aumenta consientisacion local ta nos instrumento mas fuerte pa yega e caminda pa un diagnosis corecto y pa sigura un miho red di apoyo pa e famianan cu ta biba cu Trastornonan Neurocognitivo na edad hoben.
Pa mas informacion: Telefon # 592 8416 Email: alzheimeraruba@gmail.com