Den un elaboracion adicional riba e caso contra e ex-Minister Otmar Oduber, a keda resalta un preocupacion profundo tocante e motivacion y e forma cu e instancianan di husticia procedente di Hulanda ta actua na e islanan den Caribe,incluyendo e Team Bestrijding Corruption (TBO), huesnan, fiscalnan y rechercheurs ta aborda e investigacionnan penal na Aruba y den Caribe Hulandes.
Un ‘meta predestina’ y e ehemplo di e caso contra Otmar
Segun e punto di bista expresa, e personal di husticia cu ta wordo manda for di Hulanda ta yega cu un percepcion of un meta fiho: e percepcion cu den e islanan tin un ‘roversbende’ y cu nan mision ta pa gara politico- y ciudadanonan. E postura aki ta haci cu, na luga di haci un investigacion neutral, e instancianan ta bin busca pa confirma un sospecho existente.
E caso di Otmar ta wordo trece dilanti como un ehemplo cla di e dinamica aki:
- E acusacionnan inicial mas grave a cay: E investigacion a cuminsa cu sospechonan grandisimo di un organisacion criminal, labamento di miyones di florin riba cuentanan den exterior, y negocishi ilegal cu tereno. Sinembargo, despues di dos aña di investigacion intensivo, no a logra haya prueba pa e acosonan inicial aki cu OM a bin cu ne.
- Cambio di rumbo pa busca ‘algo otro’: Na luga di cera e caso y reconoce cu e sospechonan principal no a keda proba, e instancianan a cambia e enfoke di e investigacion, buscando otro rutanan y detaye menor pa toch por persigui y procesa e persona.
Un punto cu ta keda subraya ta cu e structura di financiamento di e organisacionnan aki manera TBO ta bin di un fondo special na Hulanda designa exclusivamente pa e casonan aki. E echo aki ta crea un presion unda cu e investigadonan no por simplemente bisa “nos no a haya nada y nos ta para e persecucion”, ya cu nan tin cu hustifica nan presencia y e recursonan inverti.
E percepcion cu tur politico of ciudadano ta envolvi den algo ilegal ta hiba na un standard unda cu ta busca pa persigui cualkier falta, sin importa su magnitud.
E consecuencia pa e futuro politico di Aruba
E analisis ta conclui cu si aplica e criterianan estricto aki unda cualkier eror administrativo, como entrega un impuesto (BBO of Inkomstenbelasting) laat, ta wordo uza pa persigui un persona penalmente e standard ta bira irealistico pa cualkier ciudadano of politico. Si exigi cu un persona mester ta completamente ‘perfecto’ den tur aspecto di su bida pa no wordo persigui, e resultado lo ta cu Aruba lo keda sin lidernan politico habil pa sirbi e pais.Pero na mes momento Hulanda mes no ta mira den nan propio cas.