Menasa na establecimiento di horeca Riba diahuebs prome di october alrededor di 5’or di atardi, meldkamer central a ricibi notificacion di menasa na un establecimiento di horeca. Na e sitio a sali na cla cu un discusion a surgi entre dos persona. Durante e intercambio di palabra, a menasa un di nan cu morto. E victima a tuma contacto cu polis pa haci denuncia pa menasa di morto. Polis ta investigando e caso.
Ladronicia di auto Diabierne 2 di october alrededor di 7’or di mainta, meldkamer central a ricibi notificacion di ladronicia di un Toyota Vitz gris for di Kaya Filomena. E vehiculo tabata stasiona dilanti di un cas, riba diahuebs 1 di october, alrededor di 5’or di atardi. E caso ta bou di investigacion.
Ladronicia di pick-up Diahuebs prome di october alrededor di 10’or di mainta, a entrega un keho pa ladronicia di un Toyota Hilux color cora na un supermercado. E vehiculo tabata stasiona mientras cu tabata baha mercancia for di dje. Momento cu un rato despues e personanan envolvi a regresa, ta parse cu a bay cu e pick-up. Den e baki di carga di e pick-up ainda tabatin berdura y fruta. E caso ta bou di investigacion.
A confisca ‘fatbike’ Riba diabierne 2 di october alrededor di 2’or di madruga, un patruya policial riba Kaya J.E. Nicolaas a observa un ‘fatbike’ cu tabata cora sin luz parti dilanti. E coredo no tabata trapa e pedalnan y tabata cora cu un velocidad calcula di mas cu 25 kilometer pa ora. A hiba e ‘fatbike’ warda di polis pa un investigacion tecnico. Un prueba riba un rolbank a revela cu e vehiculo por a alcansa un velocidad di 40 kilometer pa ora sin asistencia di pedal. A confisca e ‘fatbike’.
Candela di mondi Riba diaranson 30 di september, meldkamer central a ricibi notificacion di un candela den un mondi den besindario di Kaminda di Lagun. Na yegada a bin constata cu palet y mata/piesa di di ligno tabata na candela. Brandweer a presenta na e sitio y a paga e candela.
Accidente di trafico Riba diaranson 30 di september alrededor di 3:50’or di atardi, meldkamer central a ricibi un notificacion di un accidente unilateral riba Kaya Socrates. Na e sitio a bin constata cu un auto a cora bay dal den muraya di un cas. Personal di ambulans a presenta na e sitio y a transporta e shofer pa hospital pa chekeo medico mas aleu. Di acuerdo cu e maneho di ‘botsen is blazen’, a haci un analisis di rosea cerca e shofer. For di esaki a resulta cu no tin indicacion di uso di alcohol.
Detencion pa menasa y vandalismo Riba diaranson 30 di september alrededor di 10:10’or di mainta, meldkamer central a ricibi un notificacion di un maltrato riba Kaya Neerlandia. Na e sitio, esun cu a yama a declara cu a menas’e cu un obheto mas trempan e mainta ey y cu a destrui e bentana dilanti (windshield) di su vehiculo. Polis a localisa e sospechoso un rato despues na un snack situa na Kaya Neerlandia. Un homber di 47 aña di edad di inicialnan R.D.B. a keda detene pa menasa y vandalismo. A halla un skrufdrai den un vehiculo cu, segun e victima, a uza durante e menasa. A confisca e skrufdrai. Polis ta haciend mas investigacion den e caso aki.