Aruba Dolphins Open Water 2026 a reuni 127 participante diadomingo
27 di september na Commandeurs Bay, Savaneta, pa un mainta di competencia, union
y inclusion. Famia, amigonan y sostenedornan a bin anima e landadornan y contribui na
un ambiente yena cu entusiasmo.
Organisa pa Aruba Dolphins Swimming & Waterpolo Club, e evento a inclui
distancianan di 1, 3 y 5 kilometer, ademas di un relay di 1.5 kilometer cu teamnan di
tres landado. Hunto cu landadornan local, bishitantenan di Merca y Hulanda a participa,
dunando e encuentro un toke internacional.
Participantenan di diferente edad y nivel a drenta lama cu nan propio meta: sea competi
pa un lugar riba podium, mehora nan prestacion of completa e distancia. E apoyo for di
tera a compaña nan durante e reto y a haci cada yegada na nan meta un momento
special.
Inclusion tambe tabatin un lugar special. Un landador a participa, unda ela trek un
kayak cu un atleta special abordo, pa hunto nan por a forma parti di e competencia.
Nan lema, “Yuda personanan cu limitacion yega na nan metanan den mundo di
deporte”, sigur a wordo realisa e mainta aki. E participacion aki a mustra con apoyo y
cooperacion por habri mas oportunidad den deporte.
Overall Winners
Den e 1 kilometer, Xylan Anthony a conkista e overall winner masculino cu 15:14.0,
mientras Eva Kock a gana den e clasificacion femenino cu 15:17.1.
Den e 3 kilometer, Zayron Werleman a gana den e clasificacion masculino cu
41:19.2, y Ginayla Arends a conkista e overall winner femenino cu 47:56.5.
Den e 5 kilometer, Matthew Gobert a termina como overall winner masculino cu
1:10:14.9, mientras Chloë-Nicole Dirksz a gana den e clasificacion femenino cu
1:19:52.4.
Aruba Dolphins ta felicita e ganadornan y tur participante pa nan esfuerso y
perseverancia.
Un esfuerso comparti
E evento tabata tambe un actividad pa recauda fondo pa sostene e club y e desaroyo di
su landadornan. Aruba Dolphins ta gradici Casa Haime, Compra N.V., EMS Aruba, JR
Printlab, Kiwanis Builders Club MPC, Meteoro, Prikibos, Printshop, Solid
Solutions & General Contractor y Tropical pa nan contribucion, Minister Gerlien
Croes pa su apoyo y 297 Sport pa e cobertura.
Un danki special na Roly y Winnie Bisslik, Hedy Slikker-Bisslik, famia Bisslik,
famia Schwengle, Oma Greta, Oma Nina, Shanella Garido y Jenny van den
Hengel, y tur famia cu a contribui espacio, material, cuminda y tempo. E club ta
reconoce tambe Meet Director Louella Maduro y su team, e oficialnan, e ekipo di
seguridad den kayak, voluntarionan y mayornan pa nan dedicacion.
Aruba Dolphins ta wak bek cu orguyo riba un evento cu a combina logro deportivo cu
participacion y solidaridad. Danki na tur esnan cu a haci Open Water 2026 posibel y cu
ta sigui sostene e futuro di natacion na Aruba.