PPA ta cuestiona si e legislacion actual ta manda un mensahe suficientemente fuerte pa
proteha pueblo y polis: “No sali cu arma ilegal riba bo. PPA kier p’e consecuencia bira hopi
mas severo pa manda un mensahe cla y raspa.”
Cuanto biaha mas polis mester confisca arma ilegal, prome cu Aruba tuma un decision firme
tocante e consecuencia penal? E pregunta aki a domina un parti di conferencia di prensa di PPA,
caminda parlamentario Eduard Pieters y lider di partido Otmar Oduber a presenta nan
preocupacion tocante posesion ilegal di arma di candela na Aruba.
Pieters: “Polis ta risca su bida”
Despues di reunion cu sindicato policial y diferente agente, Pieters a señala cu desmotivacion
den Cuerpo Policial ta un preocupacion hopi serio mes. Segun Pieters, e agentenan ta enfrenta
riesgo, ora nan detene e personanan arma, pero ta cuestiona si e consecuencia penal ta
proporcional na e peligro. PPA kier hiba e tema Parlamento y evalua haci e castigo minimo pa
posesion ilegal di arma dobel, pues 10 aña.
Oduber: “Aruba no ta un pais caminda bo por carga arma libremente”
Oduber a reforsa e proposicion cu un mensahe preventivo: ciudadano no mester sali cu arma
ilegal. El a referi na e accionnan reciente di control policial y a señala cu, segun informacion
comparti, ainda ta sigui haya arma ilegal y ta parce di no tin un fin. P’e esey ta indica cu e
mensahe preventivo, ainda no a logra e efecto desea. “Pensa bon prome cu bo sali cu un arma
ilegal, pasobra e consecuencia por cambia bo bida.” Oduber a menciona posibilidad di pena di
dies aña como un mensahe di severidad, pero e alcance exacto di e proposicion mester ta defini
den legislacion.
“No warda te ora un bala cobra un bida”
Oduber a cuestiona pakico sociedad frecuentemente ta reacciona cu mas urgencia despues di
un incidente fatal. Pa PPA, e discusion mester tuma luga prome cu otro ciudadano of agente di
polis perde su bida. E partido ta sostene cu e contesta mester ta uno cu ta combina prevencion,
control policial, investigacion y consecuencia penal efectivo.
Parlamento mester evalua e ley
Pieters y Oduber ta propone un debate legislativo pa determina si e castigonan vigente ta
adecuado y si un aumento por contribui na seguridad publico. E proposicion mester considera
proporcionalidad, efectividad y e diferencia entre posesion ilegal y uzo criminal di arma.
Pa PPA, e mensahe cu nan kier manda ta cla: posesion ilegal di arma no por wordo normalisa.
Pero e prueba final di un maneho exitoso lo ta menos arma ilegal riba caya y menos bida poni
na peliger.
