Den un di su declaracionnan mas fuerte y critico te cu awor, Parlamentario Mike de Meza a kibra silencio y a condena categoricamente e forma con e coalicion actual ta wordo goberna. De Meza ta denuncia cu e partido chikito Futuro ta “dicta y haci y deshaci” riba e partido mayoritario AVP, fayando directamente na e pueblo di Aruba y laga e hendenan di menos recurso pasa den martirio pa motibo di wega politico.
Segun De Meza, e crisis di poder di compra na Aruba a yega un punto insostenibel. E aumento continuo den costo di bida, material di construccion, gasoline y diesel ta kibrando e ciudadano comun, mientras cu e decisionnan politico ta keda pega den e man di coalicion.
Mencion di censura y dictacion politico
De Meza a revela e tensionnan interno cu a tuma luga ora el a presenta un mocion pa un aumento substancial di salario minimo. Apesar cu tabatin un mayoritario amplio den Parlamento incluyendo su mesun fraccion, MEP y PPA e mocion a wordo frena pa motibo di e resistencia di Futuro.
- E interupcion: E parlamentario Mike de Meza a splica cu ora e tabata na punto di tuma e palabra den sala di Parlamento, el a wordo informa cu Minister Gerlien Croes a yama pa declara e mocion “inaceptabel” debi na e fecha di entrada na vigor (1 di januari 2027), como cu Futuro no tabata para tras di dje.
- Falta di liderazgo: De Meza a expresa su profundo descontento cu e reparticion di ministerio y e capitulacion politico di su propio partido. “Ta parce cu Futuro ta dicta den e gobierno aki. Cu 3 asiento nan ta manda riba un partido di 9 asiento. Esey no ta e partido cu mi ta conoce, ni e principionan Cristiano Democrata cu semper a lucha pa esnan menos afortuná. E forma aki di goberna ta un faya directo na e pueblo di Aruba.”
Respondiendo na e argumentonan cu un aumento di salario minimo ta castiga e sector comercial, De Meza a baha e discusion aki na tera refiriendo na su experiencia como ex-Minister di Finansas (2016) ora a introduci e reparatietoeslag:
- Mecanismo di verrekening: E aumento di salario minimo por wordo compensa y verrekened di forma doelmatig via impuestonan existente (manera e omzetbelasting).
- Impacto nulo riba comercio: E modelo aki ta garantisa cu e gasto no ta cay riba e comerciante, permitiendo cu e discusion mas amplio pa baha costo di haci negoshi por sigui paralelamente.
- Alivio inmediato: E trahado cu salario minimo ta ricibi su aumento den su man di biaha, sin mester warda trayectonan burocratico largo.
“Hendenan ta sufri aya afo: basta di hunga politico”
Mantenendo un posicion firme y un compromiso, De Meza a haci un yamada di urgencia pa stop di frena e alivio cu e pueblo mester.
“Hendenan cu ta biba marginal riba un salario minimo ta sufriendo aya afo. Mi ta pro aumento di salario minimo all the time, pero e mester tuma luga INMEDIATAMENTE. Bo no por laga e hendenan cu menos entrada un banda pa haci fabor politico. Pa mi, esey ta completamente inaceptabel.
