E temporada mas spera di aña a drenta oficialmente den su fase inicial cu e apertura di Carnaval 73, bao di e tematica “Isla di Carnaval”. E evento inaugural tradicional a tuma luga dia 11 di november riba e tereno di estacionamento di Aruba Tourism Authority (ATA) na L.G. Smith Boulevard 8, marcando asina e inicio oficial di e celebracion cultural mas grandi di Aruba.
Durante e ceremonia, e presidente nobo di Stichting Maneho di Aruba su Carnaval (SMAC) pa Carnaval 73, Rusette Croes, a yama bon bini na henter comunidad den nomber di directiva, destacando cu e organisacion ta cla pa trece energia creativo bao di lus carnavalesco. Croes a anuncia cu e edicion aki ta dedica specialmente na nos musiconan, reconociendo nan como e alma, ritmo y identidad di nos Carnaval.
Homenahe na pioneronan y e generacion actual Den su mensahe, presidente di SMAC a rindi homenahe na tanto e pioneronan cu a habri caminda esunnan cu a toca musica di oido y cu instrumentonan simpel pero cu pasion sin limite como tambe na e generacion di awor. Esaki ta inclui e cantantenan, musiconan, compositornan, areglistanan y tur esunnan tras di cortina cu ta traha pa e musica di steelpan, calypso, tumba, brass band, roadmarch y soca sigui crece y briya localmente y den region.
“Na nos musiconan, Carnaval 73 ta di boso. Cu gratitud, respet y gran aprecio, SMAC ta dedica boso Carnaval 73,” Croes a expresa, enfatizando cu cada banda, cantante y DJ ta forma e pilar fundamental di e fiesta.
Enfoke riba Carnaval di Mucha y proteccion den parada Un punto central den e vision di SMAC pa e temporada aki ta e crecemento di Carnaval di Mucha. Croes a haci un yamada na mayornan pa laga e muchanan participa, y na mes momento a pidi Minister di Enseñansa, Inspeccion di Educacion y e directivanan di scol (schoolbesturen) pa brinda espacio pa promove gruponan carnavalesco na scol, inculcando e cultura aki for di chikito.
Ademas, a enfatisa e compromiso indispensabel pa cuida nos muchanan durante e paradanan. E presidente di SMAC a urgi mayornan y adultonan pa duna e bon ehempel y pone siguridad di e muchanan na prome luga, protehando nan contra solo, cuidando nan oido y evitando cualkier peligro, pa asina garantisa continuidad di Carnaval den futuro.
Inversion den festivalnan y colaboracion Finalmente, SMAC a expresa e deseo pa hunto cu su partnernan sigui inverti den festivalnan di mucha, calypso y tumba, pa aumenta tanto e participacion como e apoyo di publico y crea e talentonan di mañan. Croes a gradici tur participante, boluntario, trahado y fanaticada na canto di caminda, deseando henter Aruba un Carnaval 73 yen di creatividad, fantasia y musica.