LocalFeatured

Recaudacion di fondo pa proyecto cultural a logra 310 mil florin den un dia

Cas Di Cultura

E campaña di recaudacion di fondo pa e proyecto di reconstruccion y modernisacion di teatro a duna un resultado sumamente positivo, logrando un suma di 310.000 florin den apenas un dia, mientras cu ainda falta cierto contribucionnan pa wordo conta y confirma. E organisacion ta expresa su gran satisfaccion no solamente pa e montante recauda, sino principalmente pa e conexion directo cu a logra crea cu comunidad di Aruba.

Oportunidadnan pa sigui contribui:

Aunke e evento principal a pasa, e porta ta keda habri pa tanto ciudadanonan individual como companianan cu ke forma parti di e proyecto aki:

  • Miembresia: Posibilidad pa bira miembro cu un contribucion di 7,50 florin pa luna.
  • Adopcion di stoel: Aunke esakinan ta casi caba, ainda tin algun stoel disponibel pa adopcion.
  • Partner di legado: Contribucionnan mas grandi pa esunnan cu ke bira un partner strategico y laga un legado duradero.

Bista riba e presupuesto di 17 miyon florin E presupuesto total di e proyecto ta calcula na 17 miyon florin, loke ta inclui un reserva pa gastonan imprevisto (onvoorzien). Te na e momento aki, e proyecto a ricibi respaldo financiero significante di diferente fuente:

  • Gobierno di Aruba: A haci un aporte grandi na e proyecto.
  • Fondonan na Hulanda: A logra sigura un suma di 200.000 euro for di Cultuurfonds.
  • Sector priva: Companianan local manera Aruba Bank, Boardwalk Hotel y Ritz-Carlton a duna nan contribucion caba, mientras cu combersacionnan cu otro negoshinan ta continua.

Siguiente paso:

4 miyon pa tecnica di teatro Danki na e fondonan acumula te awor, e organisacion ta den posesion pa cubri e gastonan di e structura basico completo (full casco)  for di tegel te cu blafon. Sinembargo, ainda falta 5.5 miyon florin pa cera e presupuesto total.

E post mas grandi cu ta falta pa financia ta e tecnica di teatro, cu ta calcula na 4 miyon florin. Director di Cas di Cultura Vicky Arens  ta splica cu esaki ta trata di ekiponan specialisa y motornan di calidad halto cu ta representa un inversion grandi na inicio, pero cu tin un bida util di 30 aña. Durante e decadanan ey, lo rekeri solamente mantencion y cambio di piesanan chikito.

Otro siman e ekipo lo reuni cu e Hunta di Supervision pa evalua e resultadonan y traha un plan di accion nobo cu ideanan creativo pa logra cera e montante restante y realisa e proyecto completamente.

Related posts

Con ta para cu e situacion financiero di Arubus ?

EA News Author

Kues historiko kultural pa alumnonan di akohida despues di skol

EA News Author

Aruba a prolonga MoU di cooperacion educativo cu Merca

EA News Author

Leave a Comment

Whatsapp Message