E prome seis (6) servicionan electronico di gobierno (e-services) di Sint Maarten ta preparando pa bay online. Como preparacion, e Digital Government Transformation Project (DGTP) ta organisando e siman di eSXM Change Hub di 17 pa 20 di november 2026.
E cuater (4) dianan aki ta combina tayer practico pa e instancianan gubernamental cu lo maneha e servicionan nobo, y e Digital Innovation Days, e evento anual di DGTP na Simpson Bay Resort. Einan lo presenta e progreso di e transformacion digital di Sint Maarten, y esnan envolvi lo haya un prome demostracion di e portal di Servicionan Nobo, como tambe di eID, e identidad digital cu lo permiti nan drenta (log in) den servicionan di gobierno online.
Durante e ultimo 4 añanan, DGTP tabata pone e fundeshi pa un gobierno digital: e eID cu entrada sigur, firma electronico, y e conexionnan cu ta permiti departamentonan di gobierno intercambia informacion en bes di pidi residentenan hiba documento di un edificio pa otro. E resultadonan ta den uzo caba. Alrededor di 350.000 archivo – mas o menos 1 miyon pagina – a wordo digitalisa y awor ta wordo busca riba pantaya na e Departamento di Registro y Maneho di Informacion y e departamento di Permiso di VROMI, mientras cu Permisonan Economico y Departamento di Impuesto lo sigui pronto.
E seis registronan y e Public Service Center awor ta preparando e prome servicionan cu lo opera riba e fundeshi aki, pa asina residentenan y empresanan por haci peticion, registra y paga online, manteniendo servicio na balie disponibel pa ken cu ta prefera esey.
“Loke nos kier ta menos bishita, menos papel y pasonan cla. Si bo no mester tuma un mainta liber mas pa para den rij, cana cu un documento di un edificio pa otro, of tende ‘nos no por haya bo file’, esey ta gobierno digital haciendo su trabou. E siman di Change Hub ta caminda nos ta mustra con leu nos a yega y prepara pa loke ta bin,” segun Femi Badejo, Lider di Proyecto y Hefe di ICT di e Digital Leadership Team.
Pa e personal di e seis registronan y di e Public Service Center cu lo maneha e e-services nobo, DGTP a cuminsa cu dos dia di tayer practico riba diseño di servicio, analisis di negoshi, dato gubernamental y uzo di identidad digital den operacion diario.
E siman ta cera cu e Digital Innovation Days, cu ta trece gobierno, liderato politico y comunidad empresarial hunto. Discusionnan di panel y un demostracion bibo ta mustra unda e gobierno digital di Sint Maarten ta para y con un dia haciendo uzo di dje lo ta. Sesionnan tematico ta trata identidad digital, servicionan diseña rond di hende, siguridad cibernetico y confiansa publico, habilidadnan digital y trabou, y gobierno digital den tempo di desaster. Zonan di Experiencia (Experience Zones) na e evento lo ofrece demostracion bibo di e eID y di e servicionan cu ta na caminda.
Banda di e servicionan, DGTP y e Public Service Center (PSC) ta preparando training di habilidad digital pa publico na Ingles, Frances y Spaño.
Tocante e Digital Government Transformation Project
E Digital Government Transformation Project (DGTP) ta sostene Gobierno di Sint Maarten pa haci servicionan publico mas accesibel, eficiente y resiliente pa residentenan y empresanan. E proyecto ta wordo lidera pa e Digital Leadership Team den Ministerio di Asuntonan General, ehecuta hunto cu e National Recovery Program Bureau, y financia pa e Sint Maarten Trust Fund, subsidia pa Gobierno di Hulanda y maneha pa Banco Mundial.


