LocalFeatured

Bureau City Inspector: E yamada ta keda na cada ciudadano pa tuma responsabilidad y mantene Aruba limpi

Sushi

E problema di sushedad tira ilegalmente na Golfweg a bolbe bira un punto di atencion serio pa autoridadnan. Despues cu imagennan di e situacion deplorabel rond di e brug den e area aki a bira viral riba medionan di comunicacion, ekiponan di Bureau City Inspector (BCI) a acudi na e sitio pa inicia cu trabounan di limpiesa. Sinembargo, e magnitud di e desperdicio acumula ta asina grandi cu e departamento a anuncia cu nan lo mester di asistencia di makinaria pisa di Departamento di Obra Publico (DOW) pa por atende cu e situacion.

Segun vocero  di Bureau City Inspector na e sitio, no ta prome biaha cu nan ploegnan mester haci e mesun brug y su bisindario limpi. E funcionario a splica cu den pasado nan a yega di limpia e area aki caba por lo menos dos pa tres biaha  pero cada biaha ciudadanonan ta bolbe tira sushedad na e mesun luga.

Awe nos tey atrobe pa haci esaki limpi, pero tin asina tanto sushi cu en realidad nos ploegnan no por bay haci’e cu nan mannan,” e vocero a declara. Pa e motibo aki, BCI lo tuma contacto cu nan direccion y cu DOW pa solicita refuerso y ekiponan pisa. Ademas, tin presencia di bestia morto tira na ambos banda di e caminda, loke ta crea un holo insoportabel y un situacion antihigienico. Pa esaki, BCI ta evaluando pa acerca Dienst Hygiëne (Departamento di Salud Publico) pa evalua si mester desinfecta of spuit e area.

Un zona turistico y consecuencia directo pa comunidad Golfweg ta un ruta frecuenta pa hopi turista cu ta dirigi nan mes direccion lama na e parti panort/patras di San Nicolas. E representante a lamenta cu e bista aki ta daña e imagen di nos isla, mientras cu e desperdicio ta parce di ta wordo tira pa hendenan di e mesun bisindario.

Durante e declaracion, a haci un apelacion fuerte na comunidad pa uza sano huicio y stop di tira sushedad riba tereno publico. A recorda pueblo di Aruba, y specialmente habitantenan di San Nicolas, cu Gobierno di Aruba a habilita zonanan di desperdicio caminda por deposita sushi completamente gratis.

Tambe a enfatisa cu e actitud aki tin consecuencianan directo pa e mesun ciudadano: durante e ultimo awaceronan fuerte, varios rooi den diferente bario a keda blokia (“replug”) netamente pa motibo di e cantidad di desperdicio tira den naturalesa.

Cooperacion y investigacion :Aunke den pasado BCI a yega di investiga e origen di e sushedad door di revisa cahanan, recibonan of documentonan cu nomber haya entre e desperdicio  e biaha aki e presencia di bestia morto y e estado antihigienico ta haci casi imposibel pa e trahadonan busca evidencia den e monton di sushi.

Bureau City Inspector a recorda cu recientemente a estrecha lasonan di cooperacion cu DOW, incluso dentro di e structura di un Rapid Response Team, y ta confia cu hunto nan lo logra kita e desperdicio aki den e proximo oranan of dianan. Mientras tanto, e yamada ta keda na cada ciudadano pa tuma responsabilidad y mantene Aruba limpi.

Related posts

Miembronan di e órgano legislativo di Pais Kòrsou a aprobá e proyekto di lei pa introdusí un Defensor di Mucha (kinderombudsman) na Kòrsou.

EA News Author

Militarnan ta lora nan manga di kamisa durante ehersisio ‘Caribbean Engineer’

EA News Author

AHATA: Reforma fiscal real mester ensera menos gasto gubernamental

EA News Author

Leave a Comment

Whatsapp Message