Den fin di siman tras di lomba a finalisa e torneo di Kickball. Un deporte cu ta poco poco a bin ta subi den popularidad.
Un di e finalnan di diadomingo ultimo tabata den categoria di damas, unda cu Almas Libre a enfrenta e team di Yoyos Kick cu a yega e final di un forma invicto. Nan ultimo partido hunga tabata diasabra anochi cu nan a gana cu score minimo di 1-0.
Hopi amante di deporte tabata pendiente pa resultado di e wega aki cu a cuminsa pa 8’or di anochi. E muchanan di Yoyos Kick a mustra un cansancio y un falta di concentracion cerca gran parti di e hungadonan.
For di prome inning caba Almas Libre a bay ariba 1-0 y despues a subi e score na 3-0. Sinembargo despues di un out den di tres inning a bini un cambio den e wega ora cu dos persona na base Mariale Arecibe a skop e bala den left y e dos coredonan na base ta anota y e mes ta yega tercera base. Riba hit di e siguiente bateador e ta anota e careda di empate dunando Yoyos Kick e speransa.
Sinembargo e falta di concentacion di Yoyos a causa cu den e resto di e wega di un ora no a logra anota mas careda pero si a permiti tres careda mas. Di e forma aki a perde nan invicto y a keda como subcampeon y Alma Libre a keda como campeon.
Otro resultadonan ta categoria Caballeros: 1st Place Kickaholics; 2nd place KPA; 3rd place Yoyo Power; 4th place Coca Cola. Categoria Mix: 1st place The Guardians; 2nd place Almas Libres Mix; 3rd place Wawawah Baller; 4th place Party Squad. Categoria Damas: 1st place Almas Libres; 2nd place Yoyo’s Kicks; 3rd place Avengers y 4th place Aruba Bank.
