Bonaire International Sailing Regatta 2022 ta ranka sali ku un programa yen di aktividat i festividat, kaminda e museo di SKAL tambe ta forma parti di esaki. Por ehèmpel e seremonia di apertura ta tuma lugá riba djabièrnè 30 di sèptèmber for di 19:00 or te 20:30 or na SKAL, pero tambe e entrega di premio riba djasabra 8 di òktober for di 18:30 or te 21:00 or. Na e okashonnan akí, meskos ku na e otro partinan di e festividatnan, públiko ta kordialmente bon biní pa konhuntamente selebrá Regata.
Despues di a warda 2 aña e tempu a yega pa habitantenan di Boneiru pa huntu ku nos bishitantenan selebrá e Bonaire International Sailing Regatta di kustumber. Regata ta konsistí di vários aktividat riba laman i festividat na tera ku ta tuma lugá durante e promé siman di òktober. E aktividatnan riba laman ta tuma lugá durante dia i e selebrashonnan kultural for di ora ku nochi sera. Pa un bista general di e programa di siman, nos ta referí na e página di Facebook di Bonaire Regatta.
Tur aña Entidat Públiko Boneiru ta supsidiá Bonaire International Sailing Regatta. E supsidio akí ta pa tur dos aktividat: e kompetensianan di boto riba laman ku ta tuma lugá durante dia i tambe e festividatnan kultural ku ta tuma lugá parti anochi.
Stichting Aquaspeed Bonaire Windsurfers ta organisá e kompetensianan di boto riba laman. E kompetensianan akí ta tuma lugá promé na Sorobon Beach i despues na Playa tambe. E kompetensianan ta tuma lugá dia 1 i 2 di òktober na Sorobon Beach i dia 6, 7 i 8 di òktober na Kas di Regata na Playa.
Massive Productions Bonaire B.V. ta organisá e festividatnan kultural. Festival di Regata ta tuma lugá dia 5, 6, 7 i 8 di òktober riba e sitio di stashoná outo di Ofisina Prinsipal di Gobernashon i den Parke Wilhelmina. Akí lo tin vários presentashon musikal i benta di Boneiru su konosido platonan kulinario, kaminda tur hende lo risibí un kaluroso bon biní.