Den fin di siman, na Centro di Bario Brazil, a tuma luga e di 10 edicion di Festival di Canto dedica na nos Mama di Cultura, Sra. Bernadina Growell-Kock. E festival, cual ta honra e legado cultural y musical di Bernadina, a uni talento local, emocion y patriotismo den un ambiente di gran inspiracion y alegria.
Den su discurso di apertura, Sr. Mariano Bermudez, vicepresidente di e Fundacion, a expresa gratitud na pueblo y a recorda cu e aña aki ta un momento historico:
10 aña di Festival di Canto
15 aña di Nos Caya Bernadina
15 aña di Parada Cultural
Durante un rueda di prensa lo wordo anuncia e participacion den e gran Parada Cultural cu su tema nobo, y presentacion di proyectonan futuro pa sigui promove e identidad cultural di Aruba.
E festival a resulta un exito rotundo cu participacion di 22 cantante y 8 agrupacionnan tipico, tur cu un presentacion cu a lanta publico y a pone nos tradicion musical den prome plano.
Un momento sobresaliente tabata e categoria “Propio Composicion”, introduci den e edicion aki pa stimula creacion nobo di cancionnan dedica na memoria di Bernadina. Aki bou ta e resultado oficial:
Ganador Absoluto – Propio Composicion:
Raquel E. Lampe cu e cancion “Mosa di nos alma”, un obra di compositor Jhon Freddy T. Montoya, cu areglo di Danny Koolman, acompaña pa Agrupacion Tipico Stima Mi.
Segundo Luga:
E duo hubenil Whitney Nin & Ashanti Zimmerman cu e cancion “Mama ta un Pilar”, di compositor Jhon Freddy T. Montoya, aregla pa Johnny Scarbaay, acompaña pa Grupo Tipico Arubiano.
Tercer Luga:
Angelo Koolman, compositor y cantante di su mes cancion, acompaña pa Frank Croes y su Tipico Pegasaya.
Tur esakinan tabata composicionnan nobo cu ritmo di tumba, pone den escena e tradicion musical autentico y vibrante di Aruba.
Den e categoria di Cancion Existente, tabatin igual nivel halto di talento y emocion:
Ganador Absoluto – Cancion Existente:
Indra Stamper cu e cancion “Indjan di Aruba”, acompaña pa Agrupacion Tradicion Musical.
Segundo Luga:
Ryan Sy, hoben talentoso, cu e cancion “Pilar”, acompaña pa Grupo Colegio Arubiano.
Tercer Luga:
Hellen Arends cu e cancion “Un Soño”, acompaña pa Tipico Alegria.
Tur e tres cancionnan tabata composita originalmente pa Sra. Bernadina Growell-Kock, y su letra y melodia a logra emociona y inspira e publico presente.
Ademas, den marco di e celebracion di 10 aña di e Festival, a wordo otorga dos Premionan Special di Trahe Folklorico, reconociendo e miho presentacion visual y cultural tanto pa dama como pa cabayero.
E premio pa Cabayero cu Trahe Folklorico mas resalta a ser otorga na Sr. Jhon Freddy T. Montoya, ken, ademas di su vestuario emblematico, a toca e curazon di e publico cu su interpretacion cu hopi sintimento di e cancion “Recuerdo” di Don Ramon Krozendijk, acompaña magistralmente pa Grupo Stima Mi.
Pa categoria di Dama, e homenahe a bay pa Julienne Schwengle, cu su interpretacion di “Di Dia cu M’a Conoce Bo”, un tributo inolvidabel na nos Mama di Cultura Aruba, acompaña pa Tipico Alegria.
Pa finalisa, e Premio di Mas Popular, escogi pa voto di e publico presente, a ser otorga na Indra Stamper cu su presentacion vibrante hunto cu Agrupacion Tradicion Musical.
Mester resalta e excelente participacion di e hobennan Arubiano, cu curazon y entrega a pone nan talento na disposicion di nos cultura. Masha pabien na tur participante, cantante, compositor, agrupación y coristanan pa un presentacion inolvidabel.
Un palabra special di felicitacion na tur miembro di Fundacion Bernadina Growell Kock, cu entrega y dedicacion a logra e meta di e festival: honra nos Mama di Cultura y preserva su legado.
Nos ta gradici tambe e presencia di Minister Mervyn Wyatt-Ras, anteriormente presidente di e Fundacion, kende den su funcion actual como minister a duna un gran sosten y a brinda un discurso elocuente den e anochi di celebracion.
Departamento di Cultura Aruba ta felicita y gradici tur organisadornan, participante, y colaboradornan pa un festival cu definitivamente a logra su obhetivo:
