ORANJESTAD,Aruba
General Manager di Terminal di Energia Aruba, a duna un splicacion di e facilidadnan y con deteriora esakinan ta. TDEA ta actualmente responsabel pa e operacion di e terminal. Sr. Eddie Oduber a comparti informacion tocante e estado di e terminal na cual recientemente a wordo referi na dje.
A cuminsa cu e FP #2 cu ta uno importante pasobra eynan e barco cu ta trece fuel pa Aruba mester drenta. E barco por mara tanto na banda panort y na banda pazuid. Parti di e structura cu ta carga e load cu e barco ta eherce contra e pier claramente ta rekeri di mantencion urgente. Den pasado planes a wordo haci pa e mantencion debido pa garantisa e operacion di e pier, sinembargo pa diferente motibonan esaki no por a wordo ehecuta completamente. Loke si a haci ta mitigacion di e risiconan cu tawata tin na e momentonan ey pa por a sigui cu e operacion den un manera safe. Y asina e barconan por a sigui drenta y distribui e fuel manera mester ta.
Fenders ta un otro parti di e FP #2 cu ta hopi importante y cu mester atencion urgente. Eynan ta unda e barconan ta mara y e Fenders mester por acapara e load cu e barco ta pone contra dje. Nan tambe tin mester di mantencion mescos cu e structura en general. A haci trabou di mitigacion, pero e trabou di mantencion mes a wordo posponi. Na november 2019 a sosode un incidente na e FP #2 unda e barco mester a bin mara na dje a cay pa motibo di corosion. Pa tal motibo ey e parti nort ta for di servicio. E parti pazuid cu ta den miho condicion si ta den servicio y tur e barconan ta sigui descarga nan productonan eynan.
A enfoca tambe riba e structura riba nivel di awa di e FP #2 cu tambe mester atencion. Eynan ta unda tin support pa tur e Product Manifolds. Eynan tambe a traha riba cierto seccion pa mitiga e risiconan pero e trabou en general ainda ta pendiente. Otro parti di e refineria ta unda tin e diferente edificionan cu ta parti di e operacion y cu for di 2012 ta isola. Por wak claramente con tempo a causa deterioracion riba e edificionan. Cu esaki ta mustra cu mas hopi tempo pasa, mas hopi trabou lo mester haci pa por drecha tur cos.
Pa loke ta e Pipe Racks a splica cu aki ta unda cu e structura cu ta carga e tubonan di e refineria cuminsa haya corosion nan ta cuminsa faya cu consecuencia cu tur e tuberianan tambe por bin abou. Pa tal motibo tin tur e areanan di preocupacion cu baricade pa garantisa siguridad di empleadonan.
E seccion di Co-Conveyer di e Delay Cooker ya tin un parti di dje cu a faya caba y a bin abou. E carriage di e Conveyer System, diferente Beams & Braces cu mester carga e peso tambe ta den mal condicion y por collapse na cualkier momento.
Un otro area cu ya a experiencia fayo ta na e waf RB2 na zeewijk. Akinan e waf no ta wordo usa pa trece e productonan di fuel, pero e ta importante ora e refineria ta den operacion pasobra eynan ta unda ta importa e crudo pa e refineria por procesa. Tambe si tin tankinan cu ta huur, eynan ta unda cu e producto di e cliente ta drenta pa warda den tanki. Durante di december 2019 a haya un fayo riba e walkway di un di e seccion nan di RB cu consequencia cu esaki tambe ta for di servicio, pendiente reparacion.
Pa loke ta un di e unidadnan di utilidad, Desalinization Plant, cu ta idle for di 2012 por mira claramente tambe e marcanan di corosion dunando asina un idea di e condicion di e planta. Otro seccion nan manera e Tower nan die unidad nan di proceso tambe ta sinti tur e consecuencianan di corosion externo desde cu e refineria a baha na 2012. Ora a baha e refineria a hasi bon trabou pa proteha e parti interno di e unidadnan door di a flush nan. Pero e parti exterior dificilmente por a haci mucho mirando e localidad y e ambiente cu e refineria ta aden. Cu tempo sigur e structura lo tin consecuencia di corosion cu ta bay hiba na un scope of work mucho mas grandi si tarda e proceso pa drechanan.
Por ultimo a referi na e Hydrogen Plant como ejempel y por a wak un muestra di kico por ta e consecuencia pa e ekiponan y e estado degrada di e planta. Dus claramente mas tempo warda, mas atras e refineria ta bay.
