Social

DAS ta preparando pa pago di bijstand dia 4 di april proximo


ORANJESTAD,Aruba

En conexion cu e siguiente pago di bijstand riba diasabra 4 di april proximo, Departamento di Asunto Social (DAS) ta haciendo tur e preparacionnan necesario pa asina esaki por cana den un ambiente sigur, trankilo y segun e normanan stipula door di Departamento di Salud Publico (DVG) y Gobierno di Aruba.

Localidadnan di pago

Actualmente pago di bijstand ta tuma luga den 6 diferente districto na 6 diferente localidad. Orario di pago di bijstand ta tuma luga for di 8:00 am te cu 12:00 pm na Postkantoor SN, MFA Savaneta, MFA Sta. Cruz, MFA Paradera, Postkantoor O’stad y por ultimo MFA Noord.  

Preparacionnan logistico

Pa e pago por cana sigur y segun e normanan stipula door di DVG y Gobierno di Aruba, DAS a pidi cooperacion di DOW pa pone tent parti pafo di e localidadnan di mas grandi cu ta Postkantoor SN y Postkantoor O’stad pa asina brinda sombra na e clientenan na momento di warda nan turno pa pasa paden.

Distanciamento Social

DAS kier pidi e cooperacion di tur cliente cu ta para pafo pa por fabor practica e “distanciamento social” di 1,5 meter. Pa yuda e parti aki na e dos localidadnan di mas grandi cu ta Postkantoor SN y Postkantoor O’stad, DAS a pidi cooperacion di DOW pa pone pion parti pafo.

Pa evita aglomeracion den e localidadnan, ta bay permiti solamente 20 persona paden di cual lo bay wordo reparti segun e fam den secuencia alfabetico di A te cu K, despues di L te cu Z y cada biaha 10 hende pa e dos gruponan aki. Tambe lo bay marca e parti paden, e distanica necesario entre e personanan cu ta para den fila.

Mucha. Hende Grandi y interna den HOH

DAS kier haci un suplica na tur cliente pa por fabor no bay cu mucha. Ta pidi cooperacion di  cada mayor pa regla for di awo caba pa e mucha(nan) keda cas bou vigilancia di un familiar y of adulto.

Durante e orario di pago tur hende grandi lo haya prioridad pa asina nan por bay mas lihe posibel bek nan cas.

Cliente cu kisas ta interna den HOH y cu no por cobra nan bijstand, por fabor avisa e trahado social di HOH pa regla esaki na tempo.

Ambiente sigur y trankilo

DAS a pidi KPA cooperacion pa polis patruya durante e orario menciona na tur e 6 localidadnan, esaki pa asina trece un ambiente sigur y trankilo cerca nos clientenan y pa evita aglomeracion.  

Final

Manera ya ta conoci DAS ta cera pa bishita publico pero tur servicio regular ta continua telefonicamente. Seccion di bijstand su liña di telefon ta 528-1110 of si esaki ta ocupa por tuma contacto cu DAS su number central cu ta 528-1100. DAS ta riba facebook y tur ‘update’ ta wordo comunica mesora riba nos pagina Departamento di Asunto Social, ‘like’ nos pagina y keda bon na altura di tur cambio rond nos servicionan.

Related posts

Historia di teatro na Aruba

EA News Author

SETAR construyendo Teleshop nobo na Palm Beach

EA News Author

Fundacion Lotto pa Deporte ta organisa loteria: Minister ta determina maneho di deporte

EA News Author

Leave a Comment