Aruba ta un isla cu hendenan di fe. Hendenan trahador y simpel , hendenan bendiciona.
Ta un hecho y realidad, cu mayoria di nos, nos como hendenan social, humilde y amabel ta gradici Dios pa nos pan di cada dia. Hopi ta reza un “Nos Tata” of un “Ave Maria ‘.
Diadomingo anochi ultimo na Atelier’s 89 hopi curazon a wordo inspira, cu e magnifico actuacion y presentacion di e gran y bunita artista unico den su estilo, Natusha Croes, cu su movecionnan meymey di “garatia, shovel y piek” den santo den cura di e Atelier aki, e scol di arte, e scol cu ta duna tur sorto di workshop riba e tereno di arte pa artistanan y esnan cu kier expresa nan talentonan artistico. Un anochi bao di streanan y den cura e palonan di mata dorna cu bombiyonan di luz, cu mas a inspira Natusha, pa expresa su mes den su mes na su mes, con e ta conekta y a huza e santo cu un comchi awa, basha riba su cabes, pa demonstra cu hasta lodo ta algo bunita. Mientras e tawata move den e tera, un grabacion di su vos sensual a expresa poeticamente su ser.
Un bunita Machi sinta riba un stoel blanco emociona y na yoramento, a ricibi y accepta e “Ave Maria” di Natusha, como apertura di e grandioso exposicion “P.A.N.” – God’s artists (in times of covid) – pan cu e artistanan no a haya durante pandemia – Artistanan manera entre otro : Fernando Vermeer, Anuar Habibe – Samuel Sarmiento – Armando Goedgedrag – Danilo Geerman – Velvet Zoe Ramos – y e artista estelar cu a briya e anochi aki, Natusha Croes. E academia of scol di arte Atelier’s 89 tin un bachi y shimis nobo , cu su murayanan yen di arte bunita pinta, un parti di cura cu a hanja tubonan cu wayanan pa asina tur cu pasa eibanda por wak paden di algun di e lokaalnan cu arte den nan.
Awor bo por wak door di e cura dor di e glasnan di bentananan tambe nobo, e arte cu tin paden di e klasnan.
Pa anjas director artista Elvis Lopez ta traha hopi duro cu su team di artistanan,organisa y duna cursonan y workshops y ta sumamente gradicido na tur nan sponsernan di anjas cu semper a kere y apoya nos arte aki na Aruba. Esaki ta solamente un chispa di e trayectoria largo di Atelier’s 89 cu a pasa den su mesun ups and downs, pero cu bista positivo ariba futuro sigur, mirando cu mas y mas hobennan kier expresa nan talentonan artistico. Un di e bunita curason y caranan di Atelier’s 89, banda di Elvis Lopez, un di e man drechinan di Elvis, e artista bunita Lupita Bernabela, ta inspira tur cu ta bishita e scol di arte aki.
Nos ta yama e atelier aki un scol di arte, pasobra e ta situa den e edificio antes MAO school.
E diadomingo anochi aki tawatatin hopi hende, hopi artista y amantenan di arte cu a bin presencia locual e artistanan menciona y tambe esnan cu nos no a menciona, a crea riba inspiracion di nan creatividad y fantasia. Prome ministro Evelyn Wever Croes a dirigi palabra y den su bunita charla espontaneo a gradici tur e artistanan y tambe esnan cu no ta artista pa nomber, pero cu durante e pandemia a crea hopi cos diferente y bunita na cas mes. Sra. Wever Croes a felicita tur pa nan aporte na arte y cultura. Ela hasi esaki den representacion di Ministro di cultura sra. Xiomara Maduro cu no por tawatei presente. Nos pabien na tur e artistanan cu nan bunita obranan den e exposicion P.A.N. Y hopi exito na tur e artistanan cu lo participa na nan otro workshopnan den futuro. Na tur nos lectornan, un dushi dia yen di sabiduria den nos alegria.
Ah si ! Pabien na tur studiante cu a slaag y of bai over ! Corda yuda na cas den boso vakantie .
Esnan cu no a logra e anja aki, sigi purba, bo sa awor cu bo mester tin mas diciplina den bo estudio. Danki na miembronan di prensa, pa publicacion di e relato aki. Love you too !
