Pius X school a ricibi un delegacion di parlamentarionan di Latino America y Caribe cu ta di bishita na Aruba pa e reunionnan di Parlatino. E bishita aki a enfoca riba e logronan di e centro educativo como un “Scol Saludabel”, un iniciativa cu ta den su di tres aña oficial di ehecucion y cu ta impactando positivamente tanto e studiantenan como e maestronan.
Clasnan Practico di Educacion di Salud y Agricultura Escolar
Durante e recorido, e parlamentarionan di Parlatino por a presencia di cerca con e alumnonan ta ricibi les di educacion di salud (gezondheideducatie). E studiantenan a demostra con nan ta pisa fruta, lesa y analisa e etiketanan di informacion nutricional riba e productonan, y siña e importancia di un alimentacion balansa.
E delegacion a bishita tambe e trein (hardin/hofi) di e scol, guia di docentenan. Eynan nan a observa con e muchanan ta participa activamente den e cuido di e matanan y den cosechamento di frutanan y berduranan local. E bishitantenan a haya e oportunidad di purba parti di e cosecha fresco di e mata di papaya di e scol.
Un proyecto cu a nace despues di COVID-19
E programa di Scol Saludabel a inicia tres aña pasa cu un enfoke prome riba e bienestar di e docente:
“El a sali for di despues di e temporada di COVID unda cu nos a cuminsa pensa riba e maestro pa sinti su mes bek sano y safe den scol. Despues di esey, nos a cuminsa traha na e bienestar (welzijn) di e maestro y e mucha den scol. Scol saludabel no ta solamente come saludabel, pero sinti bo mes bon, bay om cu otro, y e parti mental cu ta hopi importante.”
E resultadonan di e proyecto aki ta visibel den e desaroyo integral di e muchanan. Hopi alumno a purba berduranan local come concomber crioyo pa prome biaha den nan bida y awor ta cosecha bacoba, banana, y papaya.
E siñansa aki ta traspasa pa e casnan di e studiantenan, unda nan ta comparti cu nan famia loke nan a siña na scol. Ademas, e scol a nota un cambio positivo den e actitud di e muchanan, cu awor ta demostra mas resiliencia, miho convivencia, y mas cuido y atencion pa otro.
