Parlamentario Endy Croes a lansa un critica fuerte siman aki contra e actitud di e fraccion di AVP den Parlamento, tildando nan di ta hunga un papel “infantil” y di falta curashi politico. Segun Croes, e parlamentarionan di e partido berde ta sconde tras di consehonan legal pa no mester splica pueblo pakico nan ta faborabel na un Rijkswet cu ta compromete autonomia di Aruba.
Durante un declaracion oficial, Croes a reacciona riba e posicion di Parlamentario Stephanie Sievinger, kende a indica cu mester spera riba e advies di Raad van State prome cu por hiba un debate profundo. Pa Croes, esaki ta un tactic di demora pa complace lider di AVP, Mike Eman, y e ministernan Geoffrey Wever y Gerlien-Croes, kendenan ta para formalmente pa e ley di Reino.
Falta di opinion y weso di lomba
Croes a cuestiona e integridad di e representantenan di pueblo den e fraccion di AVP. “Bo mester como parlamentario por para pa un opinion. Nan no por bisa si nan ta ‘voor’ of ‘contra’?”,. El a subraya cu ya caba tin mas di 10,000 firma di ciudadano y 13 sindicato cu a expresa nan rechaso total contra e Rijkswet aki, locual mester ta suficiente base pa un representante di pueblo tuma un posicion.
E parlamentario a referi na e parlamentarionan Sievinger, Bermudez, Hart, Sneek y Arends como e grupo cu ta permiti pa un “partido chikito” den coalicion tuma decisionnan cu no ta cuadra cu e deseo di e comunidad. El a tilda nan di ta “parlamentarionan di panlefi” y sin “weso di lomba,” argumentando cu nan ta pone interes di partido y di Mike Eman prome cu interes general di Aruba.
Argumentonan constitucional y economico:
- Voluntad di Pueblo no ta wordo respeta: A recorda e referendum di 25 di maart 1977 caminda 82.5% di pueblo a vota pro Status Aparte.
- Inconstitucionalidad: A cita e opinion di Profesor Elzenga, kende a splica cu e structura di e Rijkswet aki ta contra constitucion.
- Freno Economico: A referi na un rapport di Algemene Rekenkamer di Hulanda cu ta indica cu e prome dies añanan di Rijkswet na Corsou y Sint Maarten a stroba nan desaroyo economico.
E “Hotel California” di politica
Haciendo un comparacion cu e situacion di 2020 durante e pandemia, Croes a splica cu e tempo ey a negocia pa saca e “Coho” for di mesa y a hinke den un “onderlinge regeling” cu un clausula di salida (exit-bepaling) concreto di cinco aña. Sinembargo, el a critica cu e protocol actual firma dia 29 di augustus 2025 pa e gobierno di Mike Eman, no tin un salida cla.
“Pa mi, e ta un ‘Hotel California’; bo ta drenta pero nunca mas bo ta sali,” Croes a adverti, indicando cu Aruba ta keda mara na Hulanda sin un prospecto di recupera su autonomia den futuro cercano.
Un yamada na pueblo
Finalmente, Croes a pidi pa recorda e palabranan di Mike Eman na 2014, ora el a declara den un welga di hamber cu e “no ta move ni un milimeter pa entrega autonomia,” ni maske Hulanda paga e debe di e pais. “Kico a cambia? Di con awor boso a bolter 180 grado?”, Croes a cuestiona, afirmando cu Parlamento lo mester percura pa haci su trabou debidamente den e dianan nos dilanti hunto cu e movemento di pueblo y e sindicatonan pa frena e ley aki.