Den ambito financiero, Minister Geoffrey Wever ta enfrenta critica cada biaha mas fuerte pa decisionnan cu ta lanta duda serio riba transparencia, husticia y bongobernacion
Su propuesta reciente pa exonera cierto comerciante di pago di winstbelasting riba edificio cumpra den caya principal, mientras comerciante cu ta huur si mester paga impuesto, a genera sospecho di faboritismo y trato desigual. Mas alarmante ainda ta cu Parlamento a aproba e iniciativa aki, loke ta mustra claramente un falta di analisis politico y tecnico pa aproba un iniciativa asina.
E manera cu e ley a wordo presenta y tramita den Parlamento ta refleha deficiencia grave den planificacion y evaluacion, lanta hopi bandera cora riba posibel conflicto di interes. No ta desconoci cu tin indicacion cu e propio ministro tin interes pa adkiri diferente edificio den caya principal. Si esaki ta berdad, e pregunta legitimo ta: a traha e ley pa Aruba, of pa su mes?
Ademas, e creacion di un fondo publico sin structura claro ni regla transparente riba su uzo ta wordo percibi como un riesgo serio pa maneho responsabel di placa di pueblo. E falta di informacion riba destino y uzo di e fondonan ta debilita confianza di ciudadanonan di Aruba y den gobierno.
Tambe tin desconfiansa riba “destaho público” cu ta tuma luga, e palabra mes ta bisa “destaho público”, te dia di awe no tin transparencia riba con e procesonan a tuma luga ni con Minister di Finansas Geoffrey Wever ta gastando placa di pueblo. Esaki ta contradeci e principio basico di transparencia cu mester guia tur inversion publico.
Tin preocupacion creciente cu mal maneho financiero por hinca Aruba den mas debe un biaha mas y pone Hulanda den posicion pa interveni di nobo. Esaki por habri caminda pa un Koninklijk Besluit (KB) cu ta duna Hulanda mas control riba finansas di Aruba. Hopi ciudadanonan ta puntra si e situacion aki ta wordo crea consciente of inconscientemente pa decisionnan di propio minister.
Aruba ta na un momento decisivo den su historia. E pais mester liderazgo responsabel, transparencia absoluto y un strategia financiero claro pa proteha su identidad, su economia y su autonomia dentro di Reino Hulandes.
Sin un cambio di rumbo, tin riesgo real cu Aruba por perde stabilidad interno y reputacion internacional, particularmente bou di actual gobierno di AVP–FUTURO, y mas specificamente bou di maneho di Minister di Finansas Geoffrey Wever di FUTURO.