Durante un conferencia di prensa, Parlamentario Mike de Meza a duna claridad tocante su posicion politico y e posibilidad di bira minister den e gobierno actual, mientras el a bolbe podkreka su desacuerdo cu varios punto den gobernacion,principalmente e HOFA (Landsverordening houderschap en financiële beheer Aruba / Ordenansa Nacional di posesion y maneho financiero).
Parlamentario Mike de Meza a trece un aclaracion fuerte y directo durante su reciente conferencia di prensa tocante su futuro politico y e posicion cu e ta ocupa actualmente. Den su palabranan, e no a gaña y a laga tur cos cla riba mesa.
Segun De Meza, ta evidente cu e ta ministeriabel. Sinembargo, e ta subraya cu e pregunta si e tin e deseo pa bira minister awor, ta un asunto completamente diferente. Pa e parlamentario, su compromiso no ta depende di un cargo ministerial pa por sirbi e pueblo. E ta splica cu e por sirbi e comunidad di Aruba tanto como minister, pero tambe como parlamentario, caminda e ta carga e responsabilidad di ta critico pa por defende interes di tur ciudadano di Aruba. Segun e parlamentario, e rol aki di ta critico den parlamento ta un tarea cu e ta ehecuta cu lealtad na e interes general di Aruba, y nunca esey ta cambia pa motibo di e persona cu ta sinta den e stoel di minister.
Pa De Meza, e punto di salida semper ta e interes general di Aruba, unda e promesa haci na e pais ta prome cu e interes di e partido politico. E ta insisti cu e no tin nada di haber cu bisa nada di partido, pero si e ta enfoca riba hechonan cu ta keda demostra dilanti di e realidad di nos pais y di loke a pasa.
Durante e conferencia, el a trece dilanti cu e tin un claridad total pa loke ta trata e puntonan cu e ta considera sumamente importante. Un di e temanan cu a causa mayor preocupacion pa e parlamentario ta e discusion riba e Rijkswet. Den e contexto aki, De Meza ta enfatico: e pueblo di Aruba ta contra di cualkier intento pa toca nos autonomia. Pa e parlamentario, e decisionnan cu ta afecta nos autonomia mester keda den man di e pueblo di Aruba mes, y no por ta un decision di un politico so, sino un decision cu ta bin di e pueblo mes.
Na mes momento e parlamentario ta duna di conoce cu e por tin simpatia y comprension dicon lo mira e posibilidad eventualmente a yega na e HOFA cu ta situacionnan finansiero , pero pa su persona nan no ta suficiente, sigur no den e ley cu tin actualmente di Rijkswet HOFA , pero tampoco e no ta suficiente cu pa placa ta entrega e autonomia di Pais Aruba.
E autonomia di Aruba ta un derecho cu nos antepasadonan a para y bringa pe y a prueba tambe cu esaki ta e miho decision cu Aruba por a tuma pa haya su status aparte. Por a mira tambe di e personanan di mas edad por papia y sinti con Aruba tabata prome cu 1986 con Aruba tabata y e situacionnan cu Aruba mester a bay door di dje den e constelacion di Antias Corsou y e otro islanan cu tabata cay bou di dje, pero tambe na Hulanda tambe tabatatin hopi frustracion. Aruba kier a bira baas den su mes un cas y e la bira baas den su mes un cas den e forma di un status aparte y por a mira e diferencia grandi den progreso cu Aruba a encamina,
Segun Mike de Meza bo por mira cu e decisionnan cu a wordo tuma tabata desicionnan cu a wordo tuma door di E Arubianonan y no door di Hulanda of otronan , pero ta E Arubianonan ma Aruba a hiba Aruba caminda nos ta awe.