Lider di Fraccion di PPA Eduard Pieters ta contra e situacion actual cu ciudadanonan di Aruba, tanto esnan local como esnan nobo cu ta contribui na nos economia, ta enfrentando. E pregunta central ta: “Ken ta para responsabel pa e falta di un servicio adecuado?”
Crisis na Departamento di Censo
Segun lider di fraccion di PPA Eduard Pieters , e situacion na Departamento di Censo ta birando inaceptabel. Nan ta cuestiona con por ta posibel cu, pesar di tin un directora cu semper a traha duro pa upgrade e departamento, ainda tin asina hopi problema pa brinda e pueblo e servicio di “cinco strea” cu nan merece.
“Nos pueblo ta paga hopi belasting y nan tin e derecho di confia den nos departamentonan. Nos no ta acepta cu un siman mas pasa sin cu Gobierno remedia e situacion aki,” Segun Eduard Pieters.
E fraccion ta haci un apelacion urgente na Gobierno pa nan traha mas hunto, cu un vision cla a largo plaso, pa evita cu e tipo di problemanan aki keda ripiti.
Problematica cu Plachi di Number
Fuera di Censo, e situacion na Departamento di Impuesto tambe ta causa hopi frustracion. Ciudadanonan ta keda “core cabes di gay” pa por haya nan plachi di number pa nan vehiculo.
- Inversion perdi: Hopi hende a cumpra auto nobo, pero e vehiculonan ta keda para den garage pasobra no tin plachi di number disponibel.
- Gastonan extra: Personanan cu ya a paga nan seguro y nan auto, mester gasta placa extra na transporte pasobra nan no por uza nan propio vehiculo legalmente.
Un yamada na accion
PPA ta considera e situacion aki como “inaceptabel y increibel” pa e aña 2026 den cual nos ta bibando. Nan ta pidi Gobierno pa no djis pone mas sinta of mas hende, sino pa bin cu un solucion duradero cu ta cuadra cu e vision cu Aruba mester.
“Gobierno mester tin vision. Ora bo tin un vision, bo ta parti esaki den terminonan corto y medio pa logra e meta general pa e pais aki,” Asina lider di fraccion di PPA Eduard Pieters a conclui.