Lider di Fraccion di PPA Eduard Pieters a expresa nan profundo preocupacion y disgusto pa e calidad di servicio cu e departamento di Censo ta brindando e pueblo di Aruba. Segun e fraccion, hopi ciudadano, incluyendo studiantenan cu ta regresa di exterior, ta enfrentando un muraya digital cu ta impedi nan di cumpli cu nan obligacion di inscripcion, un paso fundamental pa por funciona formalmente den e pais.
Un “bloqueo” digital inaceptabel
E keho principal ta dirigi riba e website oficial di Censo. Ciudadanonan cu mester traha un cita pa inscribi nan mes ta wordo confronta cu un aviso riba e pantaya cu simplemente ta bisa cu no por sigui cu e proceso. “Esaki ta inaceptabel,” Lider di Fraccion di PPA Eduard Pieters a declara, mustrando cu nan a ricibi prueba via screenshots caminda ta bisto cu e sistema no ta permiti ningun tipo di inscripcion.
E situacion aki ta specialmente grave pa:
- Personanan cu permiso di trabou: Hopi a paga sumanan halto pa nan permiso y pa nan seguro di AZV, pero ora yega e momento di inscribi na Censo,loke ta un rekisito legal,e sistema ta faya.
- Studiantenan Arubiano: Hobennan cu tabata studia na Hulanda of otro pais y cu ta regresa Aruba (sea pa a caba nan estudio of pa cambia di rumbo) no por registra nan mes bek na nan propio isla.
Falta di coordinacion ministerial
Fraccion di PPA a enfatisa cu esaki no ta un problema di un siman so. For di luna di januari caba, e pueblo a cuminsa bati alarma riba e mal servicio aki. E fraccion ta pidi un intervencion urgente di e ministernan encarga, specificamente e Minister di Husticia y e Minister di Asuntonan General, pa nan traha hunto y soluciona e fayo tecnico of administrativo aki.
“Nos no por tolera cu un servicio di gobierno, cu mester ta ehemplar pa e pueblo, no ta funciona na un manera optimal,”Lider di fraccion a subraya.
Yamada pa un solucion inmediato
Pa PPA, e derecho di e ciudadano pa wordo registra legalmente den e pais unda e ta biba y traha no mester wordo stroba pa un sistema deficiente. E falta di capacidad pa maneha e peticionnan di inscripcion ta wordo mira como un falta di respet pa e tempo y e inversion cu e ciudadano ta haci den e pais.
E fraccion ta spera cu e señal di alerta aki wordo tuma seriamente y cu Censo por habri su sistema di cita pa inscripcion back mas pronto posibel, pa asina evita mas retraso den e procesonan legal di nos ciudadanonan.