Den un reunion cu ex Minister di Salud, e organisacion PAU a presenta un vision innovando y profundo pa e futuro di cuido di salud mental riba nos isla. E meta principal ta pa move leu for di modelonan bieu y habri caminda pa un psicologia cu ta honra e identidad y e contexto social di e pueblo Arubano.
Representantenan di PAU : Psicologo Carolina Pieters-Janer a subraya cu nan ta representa un cantidad significante di psicologonan na Aruba. Pa e organisacion aki, e reto no ta djis un cuestion di ley, sino di un transformacion den e sistema di cuido y educacion.
Decolonisacion di Cuido
Un di e puntonan mas relevante di e propuesta ta e necesidad pa decolonisa e sistema di salud mental. Segun Asociacion Psicologo Arubano Uni PAU, pa hopi tempo Aruba a opera bou di un copia di modelonan Europeo, specificamente esun di Hulanda, cu no semper ta cuadra cu e realidad bibo di nos region.
“Nos ta mas cerca di Latinoamerica cu di Europa. Geograficamente y culturalmente, nos ta mas Latino cu Europeo,” e representantenan a splica.
E vision aki ta busca pa sana e heridanan causa pa e impacto di nos pasado colonial, reconociendo cu e forma con nos ta sinti, pensa y reacciona ta mara na nos historia y nos herencia Caribeño.
Mas cu djis un malesa
Asociacion Psicologo Arubano Uni PAU kier kibra cu e bista “reduccionista” cu ta mira salud mental solamente como un malesa cu mester wordo trata den un clinica. En bes di focus puramente riba e parti medico, e proposicion ta pa adopta un enfoke integral y holistico.
E puntonan clave di e filosofia nobo aki ta inclui:
- Identidad y Autonomia: Desaroya un sistema cu ta nace for di nos mesun contexto cultural.
- Cuido Integral: Cura e persona completo den su totalidad, no djis focus riba un sintoma isola.
- Comprension Social: Incorpora e contexto social, nos cultura y nos sanger den e practica di psicologia.
Un compromiso pa futuro
Cu e paso aki, Asociacion Psicologo Arubano Uni ta reafirma su compromiso pa para firme pa un structura di cuido cu berdad ta sirbi e ciudadano Arubano. E organisacion ta spera cu e cambio di filosofia aki lo marca un era nobo unda cuido di salud mental ta mas humano, mas propio y, riba tur cos, mas eficiente pa nos comunidad.