Hoogeraad na Hulanda dia 3 februari 2026
E condena di un ex-minister di Ruimtelijke Ontwikkeling, Infrastructuur en Milieu (y despues di Ruimtelijke Ontwikkeling, Integratie en Infrastructuur) di Aruba pa co-autoria den fraude contra Pais Aruba, soborno pasivo (laga su mes por bira soborna) y desfalco por keda manteni. Asina ta conseha e advocaat-generaal (AG) Paridaens na Hoge Raad den un di su conclusionnan di awendia. Tambe e condenanan di dos co-sospechosonan pa, entre otro, soborna e minister por, segun e AG, keda manteni.
E caso contra e minister
E Gemeenschappelijk Hof a determina lo siguiente tocante e manera di traha fraudulento. Na nomber di personanan huridico den posesion di un di e co-sospechosonan di e minister (un persona liga na su partido politico), a presenta peticionnan pa obtene (opcionnan riba) derechonan di erfpacht (opties di tereno). E companianan tabata “bashi” na momento di entrega di e peticionnan y, dor di esey, tabatin casi ningun balor. E meta di e co-sospechoso tabata pa, despues cu e opcionnan tabata otorga, bende e accionnan cu gran ganashi.
E rol di e minister tabata cu, a pesar di atrasunan den tramitacion di otro peticionnan, el a aproba casi inmediato e peticionnan di su co-sospechoso. Asina el a priorisa esunnan y a evita cu e peticionnan por ser evalua oficialmente segun e politica vigente.
Ademas, e minister a ricibi donacionnan di su co-sospechosonan den un periodo den cual el mester tabata dicidi riba nan peticionnan pa otorga erfpacht. Esaki ta constitui soborno pasivo. Tambe el a uza placa di un fundacion administra na su nomber ,destina pa su campaña electoral pa paga un biahe priva di su esposa, lo cual e Hof a considera como desfalco.
E Gemeenschappelijk Hof a condena e ex-minister na 48 luna presion, di cual 12 luna condicional. Ademas, el a ser priva pa 6 aña di e derecho pa ocupa cargo publico y pa ser eligi como miembro di organonan representativo. Su dos co-sospechosonan a ricibi condena di 30 luna (10 condicional) y 24 luna (12 condicional). Tur tres a presenta apelacion (cassatie) na Hoge Raad.
Keha di cassatie
E abogado di e ex-minister ta pidi Hoge Raad pa anula e condena. Nan ta argumenta, entre otro, cu e minister como representante di Aruba no por a frauda Pais Aruba, Tambe nan ta cuestiona e desfalco, afirmando cu no ta proba cu e minister a tene e cheque di e fundacion ni cu e placa a ser uza pa otro fin.
Conclusion di e AG
AG Paridaens ta considera tur e kehonan sin fundamento. Segun AG, Hof a hustifica suficientemente e condenacion. E minister no por ser iguala cu e Pais Aruba, y e prueba ta demostra cu e la uza e placa pa paga e biahe priva di su esposa.
E kehonan di cassatie di e co-sospechosonan tambe ta ser rechasa.
Por lo tanto, e AG ta conseha pa mantene tur e condenanan y e penanan.
Sentensia di Hoge Raad
E fayo final ta provisoriamente programa pa 14 april 2026 proximo.
Un conclusion di AG ta un analisis independiente y un conseho na Hoge Raad; Corte ta liber pa sigui’e conseho of no. AG ta parti di e parket di Hoge Raad, cual ta un organo independiente y no ta parti di Ministerio Publico.
Sinembargo kico nos por siña di e caso aki ?. Ta hopi importante pa mira di cerca si ainda e modus operandus aki ta sigui den e gobierno actual , principalmente bou di maneho di minister Gerlien Croes y Geoffrey Wever, si nos mira e desaroyonan cu tin y cu ta tumando luga nan ta ok ?, e supuesto politica nobo den bachi bieu.
https://www.hogeraad.nl/actueel/nieuwsoverzicht/2026/februari/advies-ag-hoge-raad-veroordeling-voormalig-minister-aruba-oplichting/