ministerio di turismo
Manera ta custumber Minister di Turismo y Salud Publico sr. Dangui Oduber ta recapitula riba e cosnan mas importante cu e sosode den e siman anterior den su Ministerio. Sigur un siman hopi productivo y exitoso.
Dialuna siman pasa a habri cu un anuncio di e acuerdo entre TPEF, DOW y Serlimar. Un proyecto caminda TPEF ta bay haci e compras di 100 bari cu lo bay wordo aloca na nos costa for di Arashi Beach te cu Baby Beach. DOW ta keda encarga pa supervisa e trabounan cu e 10 ploegnan di TPEF ta haci. Tambe nan lo coordina cu Serlimar unda e barinan ta bay keda aloca na nos costa. Serlimar ta keda encarga pa zorg pa e barinan di sushi.
Durante e siman Minister Oduber tabata tin reunionnan cu diferente stakeholders den cuido medico. Den e reunionnan aki e mandatario a comparti su visionnan cu e tin pa cu e añanan vinidero.
Parti di e vision di Ministerio di Salud Publico ta cu lo kier digitalisa henter e cuido medico na Aruba. Esaki ta nifica cu den futuro tur cita lo mester wordo haci haciendo uzo di un aplicacion. Den e vision kier expande e uzo di e Aruba Health App caminda riba e plataforma aki por ricibi resultadonan di test, haci cita medico, haya “verwijsbrief” y busca remedinan na botica tur esaki via e App.
Minister Oduber a trece e vision aki na e stakeholders den cuido medico pa asina haya nan pensamento y tambe comparti tur e informacion di e vision aki. Segun Minister Oduber ta hopi importante pa nan wordo poni na altura di e siguiente fase di e proyecto y involucranan den e proceso.
Diaranson tabata tin un bon encuentro cu Aruba Vacation Rentals Association. Gobierno ta den e proceso pa introduci un sistema di permiso pa tur doño di vacation rentals, algo cu nunca antes a sosode segun e mandatario.
Pa e motibo aki e reunion aki ta importante como cu e ta duna e oportunidad na VRPA pa por a duna nan input. E idea ta pa yega na un maneho cu ta practico pa un y tur. Pa crea y mantene e igualdad den e condicionnan pa por opera como negoshi aki na Aruba y crea e level playing field cu tin mester. Tambe pa gobierno haya su fair share.
E tabata un siman hopi exitoso, semper ta importante pa por comparti cu pueblo tur e desaroyonan cu tin den Ministerio di Turismo y Salud Publico, e mandatario a termina bisando.
