Jan-Jaap “JJ” Brandt Corstius a haña
rekonosementu komo embahador di Boneiru, komo muestra di apresio pa su
kontribushon di hopi aña largu na nos isla i na e komunidat mundial di buseo.
Na aña 1990 JJ a bishitá Boneiru pa promé biaha, na unda a surgi un laso pa bida
largu i un apresio profundo pa nos isla ku entretantu ta dura pa mas ku 36 aña kaba.
Durante su karera impreshonante JJ tabata direktor di Scott Haldane Foundation,
kaminda el a hunga un ròl importante den formashon di dòkternan den medisina di
buseo i kaminda el a yuda desaroyá e programa akí i hasié un kurso na ingles
internashonalmente rekonosí. For di aña 1995 el a organisá i duna kursonan di
medisina di buseo atraves di henter mundu, kaminda el a duna 179 kurso (den mas
ku 30 aña), di kua 80 tabata na Hulanda i 99 tabata internashonal. Binti di e
kursonan akí a tuma lugá na Boneiru, kaminda dòkternan for di un variedat di
spesialismonan médiko a haña formashon.
Na aña 1996 su kolega Sylvia Dermout, ginekólogo i dòkter di buseo, a bin traha
serka dje komo ko-instruktor. Rápidamente nan kolaborashon profeshonal a krese i
bira un relashon personal i awor akí e pareha tin 30 aña huntu kaba. Aktualmente
nan tin un kas na Boneiru.
Pa medio di su trabou edukativo i su ret profeshonal internashonal, JJ a hunga un ròl
importante den promoshon di práktikanan seif di buseo i tambe el a trese hopi
profeshonal i bishitante Boneiru.
Despues di un karera largu i dediká den medisina di buseo, dia 1 di yanüari 2026 JJ
a baha ku penshun ku 70 aña di edat. Awor e ta spera di por pasa mas tantu tempu
disfrutando di bida na Boneiru.
Komo rekonosementu pa su kontribushonnan na nos isla, dia 6 di mart 2026
ofisialmente JJ a keda honrá komo embahador di Boneiru.
Nos ta felisitá JJ pa e rekonosementu bon meresí akí i nos ta dese’é un penshun
maravioso i relahante na nos dushi Boneiru.
A honra Jan-Jaap “JJ” Brandt Corstius komo embahador di Boneiru
