Den oranan di mardugá di djadumingu 8 di yüni, ‘meldkamer’ sentral a risibí notifikashon tokante un kaso di tiroteo ku a tuma lugá dilanti di un establesimentu nokturno situá na Kaya Prinsès Marie unda un persona a risibí bala for di un arma di kandela. Na yegada di polis, e víktima no tabata reakshoná, di kua mesora nan a kuminsá ku reanimashon.
Seguidamente personal di ambulans a transportá e víktima pa hòspital. Mas lat riba e mesun dia, polis a risibí notifikashon tokante fayesimentu di e hóben di 15 aña di edat di inisial C.C.D., nasé riba 27 di yüni 2009, na Boneiru. E mesun mardugá ei, a dirigí un patruya pa hòspital i aki a konstatá ku tabatin un di dos víktima di e tiroteo na Kaya Prinsès Marie, ku riba su propio forsa a yega hòspital.
A kuminsá mesora ku un investigashon den e kaso aki. Nos mester di bo yudansa. Bo tabata na e establesimentu nokturno òf den serkania? Bo a mira òf tende algu, òf den bo serkania bo a tende algu? No duda e ora ei, tur tep ta balioso i por ta krusial pa e investigashon.
Mèldu bo tep kompletamente anónimo
Por entregá tep kompletamente anónimo via e liña di tep anónimo. Bo ta yama 9310 i duna bo deklarashon via un meil di mensahe di bos seif. Esaki ta nifiká ku niun empleado ta enbolbí. Solamente tres funshonario spesialmente designá, ku ta kai direktamente bou di Fiskal Mayó, por skucha e mensahe. Nan ta risibí solamente e mensahe di bos – no ta registrá òf wardá bo number di telefòn, lokashon òf otro detayenan di kontakto.
Bo privasidat ta nos prioridat prinsipal. Lo eliminá e mensahe original unabes ku a skuch’é
Nos ta komprondé ku por ta inkomodo pa mèldu algu, pero bo informashon di bèrdat por hasi e diferensia. Asta un detaye chikitu por ta un avanse den e kaso.
Yama awor! Via 9310 – bo ta keda semper anónimo.