Riba djaweps 11 di desèmber diputado Peter Silberie enkargá ku entre otro e portofolio di enseñansa a bishita e tereno kaminda ta konstruí MBO Boneiru. E proyekto aki ta ser finansiá pa gobièrnu di Boneiro i ministerio di enseñansa di Hulanda.
Durante diputado su bishita e la ser kompañá pa hunta di supervishon di FPIB (Fundashon Propiedat Inmobil Bonaire) i tambe lider di e proyekto sr Norbert Balentina. Lider di proyekto durante di un rekorido riba e tereno di konstrukshon a duna splikashon mas detayá i amplio kon e konstrukshon ta tuma lugá.
Ta hasi uzo di un sistema di konstrukshon no tradishonal i ta stort e murayanan ku beton. Parti pafo di e beton tin na ambos banda un material di foam ku ta fungi komo un malchi. E sistema di konstrukshon aki lo baha kosto di konstrukshon supstansialmente i e gastunan di eksplotashon ora e edifisio ta den uzo lo ta konsiderabelmente mas abou. Banda di ta menos kostoso e edifisio ta kumpli totalmente ku e kódiko di konstrukshon konosí komo BES code ku ta nifiká ku e edifisio ta resistente pa temblor i orkan di kategoria 3.
Ku e proyekto aki gobièrnu di Boneiru ta krea fasilidatnan moderno i un ambiente agradabel pa sigui alsa nivel di enseñansa di su poblashon.
