Entrante djaluna awor Amsterdaamse Hogeschool voor de Kunst ta inisiá un proyekto piloto pa hasi un investigashon pa inisiá ku un “opleiding” pa dosente di teater na Boneiru.
Entrante djaluna 20 di Òktober tur hende ku ta interesá por hasi 5 dia di les di prueba pa haña un idea kiko e estudio su kontenido lo bai ta.
Durenta e siman lo bai tin dos dosente di teater, Yahmani Blackman di Amsterdaamse Hoogeschool voor de Kunst i Richailine Elisa ku no ta deskonosí na Boneiru i Korsou di e prestigioso Elisa Academy ku ta prepará hobennan pa bai studia na Hulanda den e ambito teatral.
Pues un invitashon na tur dosente, trahadonan pedagógiko, lidernan di organisashonnan ku ta traha ku mucha i hóben of simplemente si bo tin interes di bira un dosente di teater i kisas lanta bo moveshon teatral na Boneiru? Bo tin gana di amplia bo konosementu teatral? Bo ta mas ku bon bini. Bishita e facebook: Cutluureducatie Bonaire i klik riba e link. Por manda un whatsapp tambe na 790-0155.
Na Boneiru na e momentunan aki tin un nesesidat di profeshonalnan riba e tereno di edukashon artistiko. Pa evitá ku ta bai usa dosentenan di den eksterior ACE Foundation huntu ku Aruba den persona di Emy Lasten a aserká Amsterdaamse Hogeschool voor de Kunst pa yega na e posibilidat pa forma nos mes hendenan i sertifiká nan pa por duna arte den por ehèmpel, skol. E idea ta pa bin ku un estudio di durashon kòrtiku den kual den dos aña lo bo por haña bo sertifkashon pa por duna lès den skol. Ku e inisiativa aki Boneiru no solamente ta bai krea su propio dosentenan di drama pero tambe ta bai habri e oportunidat pa Boneiru krea mas aktor i aktris i esaki ta trese kune mas moveshon den e mundu teatral na Boneiru.
portret: grupo di trabou ku siman pasa a kuminsa traha riba e posibilidat pa un skol di teatro pa nos islanan inkluso Boneiru. E siman aki un parti di nan lo ta na Boneiru.