E fin di siman aki e Parada di Flambeu ta duna inicio na e temporada di Carnaval 70 na Aruba. Un temporada na unda Aruba su carnavalistanan lo deleita nos cu nan fantasia, alegria y creatividad pa cual e Carnaval di Aruba ta conoci p’e. Hunto cu esaki e dushi musica di Carnaval di nos bandanan y musiconan local, lo trece e ambiente unico pa nos tur por traha bunita recuerdo di e exposicion cultural di mas grandi di nos Pais.
Hopi exito y danki na tur cu ta yuda engrandece Carnaval
Minister Maduro di Cultura ta desea SMAC, tur grupo y participante hopi exito den e temporada di Carnaval 70 y ta desea pa tur hende por goza sanamente. E mandatario ta gradici tur esnan cu ta haci e celebracion grandi aki di nos Cultura posibel y ta manda un palabra di gratitud y forza specialmente na Cuerpo Policial, IMSAN, Ambulance, Serlimar, DOW, DTI, Brandweer, cosedonan, estilistanan, voluntarionan y tur otro instancia y persona cu nan trabou y esfuerso ta yuda engrandece Carnaval di Aruba.
Ban celebra sin exceso
Aruba su Carnaval ta e exposicion Cultural mas grandi di nos Pais, un temporada di gozo pa Pueblo y tambe un temporada pa mustra nos bishitantenan con nos Pueblo ta celebra y biba nos cultura. Minister Maduro ta haci un apelacion pa nos comportacion civico sin exceso innecesario y cu atencion special na nos muchanan y hobennan durante e celebracion cultural aki cu ta wordo biba tambe pa nos bishitantenan. Ban hunto biba nos cultura y laga un bunita recuerdo di e celebracion di Aruba su Carnaval 70.