Diaranson anochi na cas di su mayornan, Otmar Oduber a anuncia cu a yega na un acuerdo cu Partido PPA y cu el lo representa pa e proximo eleccion cu lo tuma lugar dia 6 di december.
Durante e encuentro aki dilanti hopi sostenedor el a anuncia cu e speerpunt di PPA lo ta nos pensionadonan. Tin 27 mil pensionado di cual 14 mil ta biba cu menos di 800 Florin pa luna y di e 14 milnan aki 1 den cada 4 ta biba den pobresa. “Nan no tin acceso medico manera nan lo desea, nan no tin acceso na e remedinan cu nan tabatin anteriormente, nan ta wordo cobra belasting riba e belasting cu ya caba nan a paga ora nan bay purba haci algo adicional pa nan por tin un miho biba. Nos a bisa cu nos ta para pa nan awe, nos ta bay traha pa nos pensionadonan”, Otmar Oduber lider nobo di PPA a declara.
E otro puntonan di atencion cu PPA lo tin ta salubridad di pueblo en general y reduccion di costo di bida.
Otmar ta mustra riba e echo cu unda cu bay hendenan ta expresa cu nan no por biba mas cu e calidad di bida cu tin na e momentonan aki, gasolin ta caro, coriente ta caro, comestibles ta caro, cas ta caro, tur cos ta caro y no ta tende cu gobierno of parlamento ta atende cu e temanan aki .
“Nos ta bisa cu nos ta bay atende cu e temanan aki, nos ta bay percura pa cambia nos sistema fiscal di BBO, elimina esaki y bay den direccion di un BTW cual ta un sistema fiscal cu tur partido ta di acuerdo cune, pero ningun tin e cohon/curashi pa bisa cu ta bay tuma e decision”. Oduber ta indica y ta agrega cu e decision aki lo ta dificil na cuminsamento, cu tur hende lo tin cu hala faha mara den e prome 6 luna/prome aña, pero despues di esey, pueblo lo haya placa den su cartera, pasobra lo baha loonbelasting, lo elimina inkomstenbelasting y reduci winstbelasting. Esaki contrario na un BBO cu unico cu e ta haci ta kita, kita y kita unda cu algo cu su prijs ta subi den exterior cu 1 Florin, pa ora un persona cumpre na Aruba den supermercado of tienda, e la subi cu 20% mas di e 1 Florin inicial.
Otmar Oduber Pensionadonan, salubridad y reduccion di costo di bida ta e prioridadnan pa e siguiente gobierno
