Durante un conferencia di prensa Rycond Santos do Nascimento a bisa di kier eleva política na Aruba pa cual el a retira di partido AVP y declara su mes independiente.
Ya caba dialuna anochi el a bisa cu diamars den dia e lo haci su anuncio. Aunke cu su decisión e momento ey tabata tuma caba, e único cos cu tabata pendiente ta si e ta keda como Parlamentario of no. Den e conferencia di prensa el a declara cu e ta keda den Parlamento cu su asiento, a pesar cu tal solamente 214 voto el a haya, menos cu varios otro candidato riba lista pero cu no a logra drenta debi na e number cu nan a haya riba e lista.
El a splica cu e hendenan cu a vota p’e tabata pa haci un diferencia y cu su hendenan nunca ta bay Cas di Partido. Esnan cu a vota p’e no a hacie pa e partido pero pa su persona y esey ta e motibo cu e ta keda den Parlamento pa representa e votadonan ey cu tin un pensamento diferente cu esun di e politica tradicional.
Aunke cu den e conferencia di prensa na diferente ocasion el a papia di “nos” y a menciona e nomber di Gerlien Croes cu tin un pensamento igual cu ne, e no a wordo compaña door di ningun hende den e conferencia di prensa.