Siman pasa nos a habri siman cu un tremendo anuncio pa e mundo deportivo di Aruba, caminda un contracto mas beneficioso pa Aruba a keda firma pa loke ta trata Fundacion Lotto pa Deporte y CBN y nos a sera siman cu un otro tremendo noticia.
Diabierna ultimo mi a asisti na e ceremonia oficial caminda Gobierno a anuncia inicio di renobacion di Compleho Deportivo Guillermo Prospero Trinidad na Dakota. Durante e actividad a hiba palabra nos Evelyn Wever-Croes, Minister President, Minister Endy Croes y presentante di Bohama cual ta e compania cu lo realisa e trabou di renobacion den 8 luna. Durante discurso hiba a accentua cu e stadion ta rico na historia y cu pa hopi hende e tin un lugar importante den nan memoria. Sigur nos no por lubida cu den e stadion aki, na aña 1976, nos a hisa Aruba su Bandera y a canta y toca nos Himno pa prome biaha. Mas cu tur cos a keda subraya con importante e stadion ta pa e ramonan di deporte futbol y atletismo. Pesey mes mi ta aplaudi e atencion cu ta keda duna na su renobacion completo na beneficio di nos deportistanan.
Pabien na nos deportista, dirigentenan y fanicadanan. Aki 8 luna boso lo tin un compleho cu ta cumpli cu tur exigencia.Tambe un pabien y gradicimento na Minister Endy Croes cu ta haci e inversion aki posibel y tambe na Canadian Bank Notes (CBN) cu lo aporta financieramente tambe na realisacion di e proyecto aki.
