Riba djárason 15 di febrüari, International Desk Bonaire, ku ta forma parti di gabinete di gezaghebber, ta organisá un tayer grátis tokante kon pa hasi petishon pa proyektonan serka Union Oropeo (EU). Personanan interesá ta kordialmente bonbiní di 10or di mainta te 12or di mèrdia na Captain Don’s Habitat.
Un di e tareanan di International Desk ta, pa pèrkurá pa habitantenan di Boneiru risibí mas informashon i mas fásil, kon eventualmente nan por pidi fondo serka EU. E tayer akí ta destiná pa tantu fundashon- komo kompanianan ku tin intenshon di bai hasi mas ku fondonan oropeo. Un eksperto riba tereno di skirbimentu di petishon pa EU lo duna un presentashon di lokual entre otro mester tene kuenta kuné ora ta skirbi un proposishon di proyekto. Ademas e tim di International Desk lo demostrá kua ta e programanan ku tin na disposishon di Boneiru.