Tourism Corporation Bonaire (TCB) ku orguyo a invitá algun studiante boneriano ku aktualmente ta biba na Hulanda, pa partisipá na BELUX Travel Awards na Brussel. E inisiativa akí a brinda un oportunidat úniko na e hóben studiantenan boneriano pa huntu ku TCB presensiá e prestigioso evento akí i akumulá eksperensia balioso den mundu di biahe.
TCB, entre otro Miles Mercera – Direktor, Marjolein Oleana – Business Manager & Europe Liaison i Elesier Angel – Cruise & Project Coordinator, durante e dia akí a duna un presentashon informativo pa e shete studiantenan entusiasmá. E presentashon a ofresé un bista den e metanan i e diferente esfuersonan di promoshon ku aktualmente ta keda ehekutá pa Boneiru. Durante e seshon TCB a haña fitbèk balioso for di e studiantenan, loke a resultá den un interkambio fruktífero di idea i perspektiva.
E studiantenan ku tabata presente, esta Jaedan Crestian, Sabine Schleper, Giani El Hage, Ruthgainy Frans, Alexander Tromp, Kirsten-Marie Martines i Tharia Phelipa a reakshoná ku entusiasmo riba e posibilidat pa ta enbolbí ku e aktividatnan di TCB. TCB ta traha konstantemente pa enbolbí studiantenan na momentu ku tin evento i bolsa na Hulanda.
“Nos meta ta pa brinda nan e oportunidat pa kontribuí aktivamente na promoshon di Boneiru. E enbolbimentu akí no solamente ta aportá na kresementu personal i profeshonal di e studiantenan, pero nos ta spera tambe ku esaki ta hasi nan entusiasmá pa despues hunga un ròl signifikante den Boneiru su sektor di turismo, segun Miles Mercera, direktor di TCB.
TCB ta spera riba un partisipashon eksitoso na BELUX Travel Awards en ta sigui hasi esfuerso pa enbolbí bonerianonan hòben ku e mundu di biahamentu.