Edukashon Artístiko di Kalidat (EKADK) a organisá un workshop di dos dia tokante Knoefy, e kontadó di kuenta. Durante e dos dianan, maestro(a)nan i otro interesadonan a sera konosí ku e programa.
Knoefy a wòrdu desaroyá pa yuda muchanan komprondé, rekonosé i ekspresá nan emoshonnan mihó. E konsepto ta kombiná kuenta, músika, teatro i teatro di pòpchi na un manera sigur i fásil di komprondé. Lèsnan ta wòrdu duná ku teatro di pòpchi tradishonal, kaminda e maestro òf maestra huntu ku Knoefy ta guia e muchanan.
Kreadó di Knoefy Archell Thompson a duna un splikashon amplio durante e workshopnan tokante e struktura di e programa i kon maestro(a)nan por usa esaki den klas. Partisipantenan tabatin oportunidat pa hasi pregunta, kompartí eksperensianan i aportá nan mes idea tokante kon pa apliká Knoefy na nan skol.
E meta ta pa Knoefy bira parti di e kuríkulo di skolnan partisipante entrante aña eskolar nobo. Di e manera aki, muchanan lo risibí sosten adishonal pa nan desaroyo sosial i emoshonal na un manera ku ta kuadra ku nan edat.
Ademas di e workshopnan, Knoefy tambe a bishitá un akohida despues di skol.
EKADK ta mira bèk ku satisfakshon riba e workshopnan i ta gradisí tur e skolnan partisipante pa nan kompromiso i kontribushon.
