ORANJESTAD,Aruba
Minister Dangui Oduber ta sinti hopi satisfecho y contento pa loke ta trata e resultadonan di e testnan di Covid-19 di e ultimo simanan.
Poco poco por bisa cu Aruba ta birando Covid-19 free. Nos ta cautelosamente optimista pa bisa cu nos ta bayendo den hopi bon direccion. E ultimo 9 dianan aki Aruba NO a registra ningun caso positivo cual ta un indicacion cu e transmicion local ta bon controla y nos na Aruba a logra contene e virus aki na un bon forma. Nos strategia pa contene e transmission ta dunando e resultado cu nos a busca.
Actualmente tin mas persona recuperando di COVID-19 cu ta test positivo, awor Aruba tin 19 caso positivo y Minister Dangui Oduber ta manda palabranan di pronto recuperacion pa nan.
E strategia di Gobierno pa haci mas test posibel ta dunando su resultado, Aruba ta un di e paisnan cu a haci mas test per capita, te awor a haci un total di 1691 test.
Minister Oduber a menciona cu Aruba mester bai adapta y tene cuenta cu e normal nobo, hopi cos a cambia caba y tur ta na bienestar general di Aruba. Pueblo mester bay sigui practica e distancia social di minimo 1.5 meter na trabou y tambe riba caya. Higiena ta esencial, labamento di man semper tabata importante pero den e temporada nos dilanti esaki ta algo cu mester keda haci cu frequencia. E unico manera cu nos por evita un brote ta door di prevencion di cada un di nos, asina Minister Dangui Oduber a duna di conoce.
Nos mester cuminsa prepara nos mes pa e siguente fase cu ta bira e fase di e “normal nobo” caminda nos lo mester bai adapta nos custumbernan. Nos ta convenci cu nos lo tin e disciplina necesario pa haci esaki.
