Oranjestad, Aruba: Sociaal Crisis Plan su meta ta pa desaroya un sistema nacional di proteccion di mucha. E pensamento tras di esaki ta cu violencia den tur sentido ta afecta un mucha of un hoben y pa evita esaki nan mester wordo proteha. Na 2018, a haci un “quickscan” di e “knelpunten” den nos sistema, esaki a wordo ehecuta door di un partido neutral: Unicef Hulanda. Sociaal Crisis Plan tin un total di 20 socio y tin 31 proyecto bou di auspicio y ta conta cu un total di 62 profesional cu ta laborando den diferente instancia y organisacion.
A introduci e metodo di Signs of Safety pa anda cu caso di abuso di menor:
Durante e trayecto Sociaal Crisis Plan organisa trainingen di e metodo di “Signs of Safety” pa tur e profesionalnan den tur 4 sector: Social, Hudicial, Enseñansa y Salubridad cu ta traha directo cu mucha, hoben y nan famia. Door di e training aki awe tur profesional den tur 4 sector por traha a base di un solo metodo pa asina maneha un caso di (sospecho) di abuso di menor na un forma structura y mas eficiente.
A introduci e Ley di Codigo di Proteccion:
E trayecto di implementacion di e Codigo di Proteccion ta un preparacion pa asina esaki wordo ancra den Ley pa proteha nos menornan di edad. Profesionalnan den tur 4 sector ta haya e guia, informacion y ta wordo sosten’i pa cu e preparacion di implementacion di e Ley aki pa e Lidernan di Proyecto di cada sector di Codigo y tambe Unicef Hulanda.
A habri e Centro pa Hoben y Famia:
Den cuadro di prevencion, Sociaal Crisis Plan a habri e Centro pa Hoben y Famia na Sabana Blanco/Wayaca, caminda ta traha preventivamente bou di un solo dak pa yuda fortalese e famianan vulnerabel den nos comunidad. Un total di 7 organisacion ta forma parti di e centro y ta riba e tereno preventivo. Por acudi libremente cerca nan pa guia, informacion, curso etc. pa tur loke tin di haber cu mucha, hoben y famia.
A realisa e “Tienermoederhuizen” na Casa Cuna Progreso
Sociaal Crisis Plan a pone fondo disponibel pa asina realiza e proyecto di e casnan di cuido pa mamanan hoben na Casa Cuna. E proyecto di Tienermoederhuis ta brinda mamanan hoben e guia y sosten pa lanta nan baby sanamente bou guia di profesionalnan.
Preparando pa habri e prome Centro di Cuido 24/7 pa nos menornan cu capacida limita:
Actualmente ta finalizando e proceso di preparacion pa asina habri oficialmente e prome Centro di Cuido pa personan cu capacidad limita cu ta rekeri cuido 24 ora pa dia, 7 dia pa siman. Esaki ta un proyecto cu a wordo realisa door Stichting Ambiente Feliz bou di guia di Sociaal Crisis Plan. E centro aki lo ta ubica na Palisiaweg na San Nicolas. Sociaal Crisis Plan tambe a duna fondo na Stichting Ambiente Nobo pa asina nan por brinda un programa pa personanan cu capacidad limita. Aki nan por pasa dia y haya cuminda. Nan ta ser ofreci un programa pa nan desaroyo.
A aloca fondo pa expande capacidad di estadia pa victima di violencia domestico:
Sociaal Crisis Plan a pone fondo disponibel na Fundacion Hende Muhe den Dificultad (awo Fundacion Contra Violencia Relacional) pa asina expande nan capacidad di “kamers” of estadia pa victimanan di violencia domestico. E meta tras di esaki ta pa crea mas espacio pa duna servicio na personanan cu a pasa den violencia relacional. Alabes FHMD/FCVR a haya fondo di Sociaal Crisis Plan pa emplea mas personal profesional.
Pronto lo introduci e prome “Family Justice Center na Aruba:
Actualmente ta trahando cu diferente “stakeholders” den sector Husticia pa introduci e concepto di un “Family Justice Center” na Aruba. E centro aki lo traha riba e parti curativo y brinda victimanan e asistencia y guia den nan caso. Pa e proyecto aki Social Crisis Plan a busca un vertrouwen arts.
A yuda cu fondo pa asina Directie Voogdijraad por a emplea mas personal pa haci trabounan di investigacion di casonan. Awo cu tin mas personal Voogdijraad a logra na reduci e listanan di espera cu tabata tin.
A realisa pa introduci e servicio “outreachend” pa anda cu casonan di adiccion y problema cu salud mental bou di nos hoben y muchanan:
Sociaal Psychiatrische Dienst (SPD) di DVG ta dunando servicio paychiatrico na pacientnan na cas. Esaki a wordo realisa danki na e sosten di Sociaal Crisis Plan cu a pone fondo necesario pa introduci e Fact-team cu ta duna e servicio “outreachend” na hoben y mucha cu tin problema cu adiccion y of problema cu salud mental.
Sociaal Crisis Plan alabes a zorg pa fondonan ta disponibel pa asina por a emplea mas psicologo y psichiater cu actualmente ta tragando den diferente departamento y organisacion.
Asina por sigui menciona mas proyectonan cu ta cay bou di auspicio di Sociaal Crisis Plan. E meta primordial di e programa aki ta pa brinda nos muchanan, hobennan y nan famia un sistema di proteccion fuerte y solido, paso nan siguridad y bienestar ta responsabilidad di nos tur. Pa mas informacion di nos proyectonan y documentonan por bishita nos website www.scparuba.com.
