Gezaghèber Edison Rijna ta lamentá ku gobièrnu hulandes a disidí pa duna Boneiru un konseho di biahe oraño. ,,Delaster tempu nos a traha duru pa bai di kódigo oraño pa kódigo hel. Nos a logra esei i e kantidat di kaso di Covid-19 a keda abou,” asina Gezaghèber a deklará. P’esei e desishon a kai di sorpresa.
E desishon a kai na momento ku ta spera un fluho grandi di turista di Hulanda. Kompanianan di aviashon a asta amplia nan kantidat di buelo pa Boneiru pasobra ta seif pa bini ku vakashon. Tabatin basta preokupashon na Boneiru paso no ta tur turista ta mantené nan mes na e medidanan ku ta konta akinan.
E medida akí ta un sla duru pa ekonomia di Boneiru ku nèt a kuminsá ta drecha un tiki. Tin kombersashon ku ta tumando lugá entre gobièrnu di Boneiru i gobièrnu hulandes tokante medida èkstra di ayudo pa pueblo pasa den e tempunan difísil. Hopi hende a pèrdè trabou den sektor di turismo kaba. Awor ku pa algun siman kaba tabatin turista ta bini na e isla atrobe, hopi hende tabata karga speransa pa futuro.
Ta di komprondé ku Hulanda ta tuma medida severo pa e pais awor ku aya e kantidat di kaso di COVID-19 ta subi atrobe. Di otro banda Boneiru tin e vírùs bou di kontròl. Awor tin sinku kaso aktivo di Covid-19. Gobièrnu di Boneiru ta bai wak e siman akí kiko por hasi pa kompensá e kontratempu. Mañan durante e konferensia di prensa lo duna mas informashon kon ta sigui anda.
