Awe ta marka 517 dia di pelgrimahe di konsientisashon den Latino Amerika I Karibe pa obtene sosten di besinjanan den region pa yuda Boneiru bai riba lista di Teritorionan-Sin-Propio-Gobernashon di Nashonan Uni. Diarason pasa 4 di Oktober despues di atende e reunion di “pasado di sklabitud” na St Maarten I presentando na Sekretario di Estado Alexandra van Huffelen un karta di protesta e delegashon a biaha pa Mexico.
Ribe e dianan 5 pa 7 di Oktober e team lidera pa James Finies di BHRO a asisti I hasi presentashon di e Kaso di Boneiru bao di tema: “Demokrasia komo derecho fundamental di tur pueblo” den e di “27 Seminario Internashonal di partidonan I un sosiedat nobo” di e Partido di Trabao kualnan ta aktualmente parti di e gobierno di Mexico. Profesor Anaya, lider di e Partido PT personalmente a respalda I duna apoyo di su partido na e pueblo di Boneiru I a permiti James Finies hasi presentashonan den tres diferente foro. Inkluyendo dia di apertura di e seminario dia 5 di oktober I e dia siguiente 6 di oktober na un evento-manifestashon di damanan I dia 11 oktober na e junta di direktiva di e partido. Resolushon I jamada pa solidaridat pa e Kaso di Boneiru pa stop Hulanda su violashonan di derecho humano na Boneiru I pa pone Boneiru bek riba lista di Teritorionan-Sin-Propio-Gobernashon di Nashonan Uni unanimamente I ampliamente a wordu apoya pa e alrededor di 800 partispantenan di 41 pais ku tabata presente na e seminario.
Pa kontinua ku e mishon di konsietisashon, riba 10 oktober, e delegashon Boneriano a kolabora ku e Universidat Outonomo Metropolitana di Mexico(UAM) pa konmemora I krea konsiensa riba e dia skur aki den historia di Boneiru. E universidat di UAM ku tin mas ku 16000 studiante ta konsisti e di e gran suidad di Mexico, Azcaptzalco den norte, Iztapalapa den este, Cuajimalpa den oeste, Xochimilco den sur I Lerma di e estado di Mexico. E institushon aki ta un di e universidatnan top akademiko na Mexico. Na 2019 e tabata rankia entre e promenan entre instutushonan publiko I priva. BHRO tabatin un booth den un aktividat na e universidat kaminda studiantenan tabata wordu informa riba e situashon di Boneiru. I nan a start un kampanja #TodosSomosBonaire na nivel nashonal di konsientisashon via medianan sosial bao di studiantenan tokante violashonan di derecho humano ku ta tumando luga na Boneiru I e hecho ku e isla a wordu ankra den konstitushon Hulandes kontra di deseo di e pueblo ku a wordu redusi na un minoria den apenas un dekada mester di atenshon mundial.
Riba 11 di oktober, BHRO a asisti na e Kongreso di Estados Unidos di Mexico I a risibi un resepshon kaluroso. E delegashon a wordu ofrese e dia aki den seshon plenaria na San Lazaro pa presenta e lucha pa derechonan di e pueblo Boneriano dilanti e 500 miembronan representando tur estadonan di Mexico. Gradisimentu ta bai na Deputado Sofia Carvajal, sekretario general ejekutivo di COPPPAL, tambe na Jorge Garcia Cordova vise-sekretario general di COPPPAL I gradisimentu spesial na Deputado Alejandro Moreno, presidente di COPPPAL pa su apoyo inkondishonal na fabor di e kausa di Boneiru. A wordu reitira na Suidat di Mexico e ful sosten di e 72 partidonan politiko di 30 pais den Latino Amerika I Karibe na Boneiru pa e wordu pone riba lista di dekolonisashon di e teritorionan-sin-propio-gobernashon di Nashonan Uni.
E obhetivo di BHRO di partisipa den seminarionan importante aki ta pa genera konsiensa mundial.
