Hues Comisario un biaha mas a aproba un entrada hudicial na DIP y confisca mas cu un computer mas documento
Den e caso aki a confisca computer di e director y otro funcionario halto, kendenan por porcierto ta casa den e mesun famia.
Manera por corda, tempo cu Otmar Oduber a bira Minister el a bini cu su maneho, unda c uta regla tur proceduranan cu mester cana pa bini na remarca pa haya tereno y con esaki ta wordo aproba. Na momento cu Marisol Lopez Tromp a asumi e puesto di Minister di Infrastructura, el a cuminsa pa coy tur cos den su mesun man, unda e mes ta dicidi riba tur cos. Esaki el a haci sin ningun dia cambia e maneho na su pensamento.
Aki ta caminda, segun empleadonan ta bisa, a cuminsa e manipulacionnan unda cu e director, en bes di haci su trabou di maneha e departamento, tabata manda tur documento pa Minister controla y firma na su discrecion.
Na momento cu a dicidi di core cu Marisol, pasobra Conseho di Ministro no por a traha mas cu ne, e cartera di Infrastructura a bay pa Prome Minister mr. Evelyn Wever Croes. E mandatario a dicidi cu e no por bay mete den un departamento cu t’asina importante pa pueblo di Aruba. El a bisa di loke ta keda di e gobernacion, e kier depolitisa DIP, di forma cu tur hende cu mester di un tereno ta haya un fair chance. Tin un procedura stipula unda cu e director y su team mester cana e caminda normal den cada peticion cu drenta.
Despues di esey por corda cu a bini manera un revuelto den DIP, unda empleadonan tabata hopi mal contento y demotiva. Y hasta a manda pa e mandatario encarga na e momento ey. A pidi e partidonan pa sinta na mesa y trata di yega na un acuerdo, pero aparentemente esey no a sosode pasobra nan no tabatin confiansa mas den e director, despues di mira tur loke el a bin ta haci na DIP.
Hasta e empleadonan tabata pidi pa investigacion, ya cu e tabata colabora estrechamente cu ex Minister Lopez Tromp pa desvia di e maneho poni door di Oduber, cu nunca a wordo adapta. Pero tambe pa e hecho cu e tabata sigui ordo di e Minister, sabiendo cu e proceduranan no tabata manera esnan poni den e maneho.
Ta imposibel cu tin ciudadano ta sperando masha hopi tempo pa contesta riba un pida tereno of adaptacion di nan tereno, pero e ruman muhe di e ex mandatario si ta haya e cambionan necesario den un siman di tempo.
Bayendo bek riba e ultimo entrada hudicial, di diabierna siman pasa, un di e computernan cu a bay cu ne ta di e funcionario Mario Maduro. E tambe tabata haci loke e ex mandatario ta bis’e en bes di cumpli cu su tarea manera ta wordo exigi di un bon ambtenaar, pa ta integro y protege pais Aruba. Por corda ainda cu tabatin hopi señalamento pa e forma con tabata kita huurgrond di un ciudadano pa despues pas’e pa otro y hasta cambia e destinacion.
Den esaki, aparentemente, ta e propio funcionarionan di DIP cu no tabata di acuerdo cu e forma di proceder aki cu ta atacha nan departamento, a dicidi di basha’bou. Pa e motibo aki a cuminsa un investigacion cu tin Landsrecherche su mannan yen.