NOORD—Despues di e acto comunitario di diahuebs y diabierna, en conhunto cu Rode Kruis, di reparticion di paña re-uzabel, na unda tabata tin hopi asistencia, CBN ta continua cu un otro acto di bon comun pa 54 muchanan di scol primario y basico na Noord.
Den ocasion di Dia Mundial di Asistencia Humanitario, cu ta wordo celebra mundialmente riba 19 di augustus, Centro di Bario Noord (CBN) a haci entrega di uniform y tas di scol na e scolnan di Noord, beneficiando un total di 54 mucha.
E accion ta enfoca riba e importancia di solidaridad, cooperacion y apoyo mutuo dentro di nos comunidad, specialmente ora ta trata di mucha y nan educacion. Pa CBN, e iniciativa aki ta representa mas cu solamente un donacion: ta un expresion di compromiso pa contribui na bienestar y desaroyo di e muchanan di Noord.
E donacion di uniform por a bira realidad danki na un gesto generoso di Hilton, cu a haci un donacion di corchonnan. Cu e fondo obteni for di e donacion aki, CBN por a cumpra e uniformnan di scol necesario pa e mucha beneficiadonan.
Banda di esaki, un ciudadano cu kier keda anonimo a haci un gesto especial di generosidad, donando tasnan di scol cu contenido pa 30 mucha. E donacion aki no solamente ta brinda e muchanan cu e materialnan necesario pa nan dia di scol, pero tambe ta demostra e impacto positivo cu un acto di solidaridad por tin den bida di un mucha y su famia.
E entrega a beneficia 5 scolnan basico y 4 scolnan primario di Noord, alcansando un total di 54 mucha. CBN ta expresa su profundo gradecimento na tur esnan cu a contribui pa e iniciativa aki bira realidad. Cada aporte, grandi of chikito, por haci un diferencia significativo ora nos uni como comunidad.
“Dia Mundial di Asistencia Humanitario” ta un momento pa recorda nos cu solidaridad y humanidad ta cuminsa den nos mes comunidad. Cu e iniciativa aki, nos kier mustra cu ora hende, organisacionnan y sector priva uni forsa, nos por crea oportunidadnan y brinda apoyo concreto na nos muchanan,” Ligia Croes Roza, Lider di Programa di Centro di Bario Noord, a expresa.
CBN ta sigui kere den e poder di colaboracion comunitario y ta anima mas persona y
organisacion pa sigui contribui na iniciativa cu ta fortalece nos comunidad y crea un miho futuro pa nos hobennan.
E accion di CBN riba “Dia Mundial di Asistencia Humanitario” ta un recordatorio cu solidaridad no tin frontera, y un gesto di generosidad por haci un diferencia grandi.
Noord Creciendo Hunto
