Frakshon di Partido Nashonal di Pueblo (PNP) ta deseá henter e pueblo di Kòrsou, en partikular nos studiantenan, mayornan, i tur trahadó den enseñansa, un aña eskolar 2026-2027 yen di éksito, progreso i bendishon. Enseñansa ta e fundeshi riba kual nos ta konstruí nos nashon, i e siman aki nos tur ta kuminsá ku energia nobo.
Komo partido, nos ta kere firmemente den e resiliensia di nos hendenan. P’esei nos tin un mensahe spesial:
Pa nos dosentenan i personal di skol: ‘Nos ta gradisi pa den e aña eskolar nobo aki, pa tras di kada mucha tin un dosente, un trahadó sosial, un shofùr di bùs i personal ku ta dediká nan tempu, pasenshi i kurason. Danki pa no solamente siña nos muchanan, pero tambe pa kere den nan ora nan mes ta duda. Boso ta e promé liña di defensa pa nos mucha- i hóbennan su bienestar mental i emoshonal. Ku Dios duna boso forsa i pasenshi pa un otro aña di hopi bendishon. Boso ta planta e simianan di nos futuro.‘
Na tur mayor i henter nos komunidat: ‘Manera e dicho ta bisa: ” It takes a village to raise a child’. Nos sa ku e tempu aki ta trese su retonan práktiko i finansiero, spesialmente ku e kosto di bida aktual. Frakshon PNP ta keda boga pa solushonnan real i direkto pa aliviá e karga aki. Pero awe, nos ta pidi henter Kòrsou pa ta e sosten pa nos hóbennan. Laga nos traha huntu pa garantisá ku kada mucha tin e oportunidat igual pa bria den un ambiente seif i yen di amor na kas i den bario.’
Na nos muchanan i hóbennan: ‘Bai skol ku kurashi i ku gana di siña. Boso ta nos futuro lidernan, nos inovadónan i e forsa ku lo hiba Kòrsou dilanti. No laga niun opstákulo stroba boso di soña grandi. Boso edukashon ta e yabi pa boso propio progreso.’
Komo boso representantenan den Parlamento, Frakshon PNP ta primintí di kumpli pa e aña eskolar aki nos sigui apliká nos filosofia di ‘Kontrolá, Proponé i Mehorá’ ku mas akshonnan práktiko pa e aña aki:
Nos lo perkurá pa finalisá i pasa e ‘Initiatiefwetsontwerp Stagevergoeding’ (Inisiativa di lei Mercelina di PNP). Nos studiantenan mester di un kompensashon hustu i garantisá pa nan trabou i esfuerso durante nan stage.
Nos lo sigui eksigí i proponé medidanan pa aliviá e karga di kosto di bida pa nos personal den enseñansa, boga pa material di skol pagabel i transporte públiko efektivo pa nos studiantenan.
Nos lo tene Gobièrnu responsabel pa drecha infrastruktura i kalidat di nos skolnan i klasnan mas efektivo, garantisá rutanan seif pa nos muchanan. Un ambiente di siña mester ta di kalidat, seif i limpi na Korsou.
Nos lo sigui boga pa mas kapasidat di trahadó sosial i guia mental den skolnan, pa yuda tantu e dosente den su trabou komo protehá salú mental di e alumno.
Laga nos hasi e aña eskolar aki unu kaminda nos ta sostené otro, kaminda nos ta lanta otro, i pone e bienestar di nos muchanan na promé lugá. Pa mas informashon semper por tuma kontakto ku Frakshon PNP via 📩 frakshonpnp2025@gmail.com, 📲 +5999 434-6077, 🌐 facebook.com/frakshonpnp.