E topico di derecho humano ta un topico cu a trece hobennan di Croatia, Spaña, Reino Uni, Sint Maarten y Aruba hunto durante 2 siman.
CEDE Aruba por medio di Erasmus + ta organisando e prome encuentro di “Youth exchange program” cu e topico “Human Rights”, (derechonan humano). Durante 2 siman e hobennan aki lo comparti e mesun cas y siña traha diferente projectonan, workshops, debate, projectonan den aire liber durante un periodo hopi cortico.
E meta specifico ta, pa comparti un experiencia unico conociendo otro cultura, custumbernan y diferente forma di biba cu por yuda nan asina pa fortifica nan balornan, manera solidaridad, democracia y Amistad. Gruponan cu ta participando lo aumenta conciencia, aumenta nan conocemento den derechonan human, comparti conocemento di nan respectivo paisnan promoviendo balornan di Libertad, tolerancia, democracia y respet pa derecho humano. Pero mas cu tur creando union y amistad pafo di nan fronteranan. E partnernan cu ta participando ta Ocean Znanja di Croatia, International Service di Reino Uni, Caribbean Education and Culture Foundation di Sint Maarten, Brisa Intercultural di Spaña y CEDE Aruba pa Aruba. Un programan basta extenso a wordo poni den otro pa nos mesun hobennan di Aruba cu ta e hostnan principal di e encuentro aki. E hobennan ta siña convivi cu otro na centro hubenil Washington, cada dia tin algo diferente y educativo cu nan ta conoce di otro. Cultura, integracion, arte y sin lubida nan bida culinario, celebrando e experiencia di cada pais. E hobennan ta sali tambe pa entrevista nos localnan riba diferente topico cu tin di haci riba derechonan humano. Charlanan educativo combina cu e bida artistico pintoresco di nos localnan. Tur esaki ta un combinacion di experiencia cu ta pone nos hobennan pero tambe Aruba mes den luz positivo den e paisnan aki y sigur den e mundo di union europeo, ora cu post e experiencia aki riba rednan social.
Esaki ta e prome biaha cu e ta wordo organisa y cu espectativa pa su continuidad den futuro. Hobennan tambe lo tin un encuentro cu NGO’s y prensa pa asina conoce e mundo periodistico di nos isla den un forma diferente y scucha kico ta pensa riba e topico di derecho humano.
CEDE Aruba ta eherce di e forma aki su tarea pa yuda sostene iniciativanan pa nos comunidad y nos NGO’s. Di e forma aki nos ta promove e uso di fondonan Europeo pa promove y eherce trabou boluntario entre hubentud y intercambio profesional.
