Minister di Asuntonan Economico, Comunicacion y Sostenibilidad Geoffrey Wever, a ricibi un delegacion di e Embahada Hulandes for di Bogota, Colombia. Presente tabata representantenan di Departamento di Asuntonan Economico, Comercio y Industuria, di Departamento di Relacionnan Exterior y conseheronan di Minister Turismo y Salubridad Publico.
E embahada Hulandes na Colombia, hunto cu Holland House Colombia, tin e tarea pa fungi como facilitadornan di interesnan di islanan di Reino den nos region di Caribe. Mientras cu Embahada ta encarga cu aspectonan gubernamental, Holland House Colombia ta encarga cu aspectonan di lasonan empresarial.
Temanan cu a ser treci dilanti tabata e relacionnan comercial entre Aruba y Colombia, energia renobabel, economia circular, turismo medico y siguridad di alimento, especialmente importacion di carni di Colombia.
Den e area di relacionnan comercial, a toca riba e interes comercial general entre e dos paisnan, tanto pa importacion y exportacion di producto y servicio, impuestonan existente den esaki y tambe inversionnan. Na final di e reunion, partidonan a expresa nan deseo pa elabora un plan concreto pa duna forma na e deseonan comercial treci dilanti pa Aruba y Colombia
