Ayera e delegashon di Kòrsou enkabesá pa Minister Hato di Hustisia a asistí na e Universal Periodic Review (UPR) di e Konseho di Derecho Humano di e Organisashon di Nashonnan Uní (United Nations Human Rights Council). Huntu ku Aruba, Sint Maarten i tambe Hulanda e delegashon a representá Reino Hulandes aya na Ginebra. Ademas di esaki e tres paisnan (Kòrsou, Aruba i Sint Maarten) a disidí di organisá un Reunion Hudisial Tripartito na Ginebra mes kual tambe a tuma lugá ayera.
Den e UPR Kòrsou a tene tres intervenshon i adishonalmente mas ku 100 pais a duna rekomendashon. Reino Hulandes den su totalidat a haña mas ku 200 rekomendashon ku por kondusí na mehoransha den vários area. E enfóke di Kòrsou tabata riba migrashon, kambio di klima, trafikashon di hende i derechinan laboral.
