Entidat Públiko Boneiru ta na altura di e situashon aktual di e kasnan di katibu a lo largu di Peleké (Pekelmeer). E kasnan di katibu tin un balor históriko importante pa Boneiru. Ta sumamente importante pa protehá nan i drecha nan mas pronto posibel.
Departamento di Planifikashon i Desaroyo a investigá e situashon na e sitio i mesora a tuma e pasonan nesesario. E kousa ta resultado di e echo ku mas òf ménos na aña 1850 a traha e kasnan hasiendo uso di kalichi di koral ku nan a kap i sin un fundeshi sólido. Pa evitá ku e kasnan ta sufri mas daño, ta importante pa sòru pa nan haña un fundeshi adekuá.
Mirando ku e kasnan di katibu ta situá na kosta, departamento di Planifikashon i Desaroyo mester pidi e pèrmit nesesario pa e trabou di reparashon. E pèrmit ta nesesario a base di e Ordenansa di Maneho di Naturalesa (Dekreto insular parke marino artíkulo 28 i Dekreto insular maneho di naturalesa artíkulo 8) pa salbaguardá protekshon di naturalesa. Pa evitá mas daño e Komishon di Maneho di Naturalesa i Stinapa ta trata e petishon akí ku urgensia. Tan pronto ku otorgá e pèrmit akí por hasi e trabou di reparashon.