Den su ultimo rapport CAFT a elogia gobierno pa su disciplina y pa mantene tur su gastonan abao segun e normanan acorda. Asina CAFT ta premira si e economia sigui cu mesun resilencia y gobierno logra e 1% di surplus tur aña, e debe nacional di Aruba por baha te cu 69% pa 2027! Esaki tambe a wordo confirma den e “voorjaarsnota” 2023 cual a drenta Parlamento 25 di Mei 2023. E ta importante pa pueblo wordo informa riba e desaroyo super positivo aki, ya cu pueblo ta custumbra pa wak con gobierno di AVP semper tabata tin deficitnan durante henter nan gobernacion di 2009-2017. Esakinan a varia entre 180 miyon pa 445 miyon florin tur aña (casi mita biyon.) Esaki a acumula na 2.2 biyon florin y a causa un aumento di nos debe nacional pa 86.2% segun ARA, IMF y CAFT.
Plan structural pa baha e debe nacional di Aruba
For di algun aña pasa a acorda cu Hulanda y CAFT pa gobierno traha riba presupuestonan, basa riba reformanan fiscal. E meta ta pa gobierno semper sigura un surplus riba tur presupuestonan di pais Aruba y asina por paga riba nos debe nacional y haci inversionnan local. Aki ta sigui un tabel di e plan:
| Aña | 2023 | 2024 | 2025 | 2026 | 2027 |
| Porcentahe debe | 90% | 81% | 77% | 73% | 69% |
Memey di hopi acusacion di opositornan, cu ta desepera pa haci nos pueblo kere cu gobierno ta manehando nos pais den un abismo, CAFT y IMF su rapportnan ta keda mustra e gran trabao cu nos gobierno a bin ta ehecutando. Aruba ta recuperando, y pueblo por ta sigur cu e placa cu ta drenta caha di gobierno ta wordo distribui di un forma responsabel y tambe creando surplus pa paga debe y haci inversion.
E forma nobo aki di goberna un pais ta habri un era nobo nos dilanti, den cual nos pais por progresa y baha nos debe y hasta elimine completamente. Algo cu opositornan no kier pa pueblo kere. Actualmente nos ta na 88% di debe segun CAFT y manera e tabel ariba ta mustra Aruba por yega te na 69% di nos debe compara cu nos GDP pa 2027 caba. Esaki ta 5 aña mas lihe cu e norma cu a bay di acuerdo cu ne cu Hulanda y CAFT. Aruba ta riba un bon caminda, un caminda di speransa cu un direccion nobo di progreso. Pandemia a dal nos duro, pero mescos cu den pandemia, gobierno ta gobernando cu vision y un man solido pa guia Aruba den su recuperacion financiero. Esaki ta e politica nobo cu Aruba merece.
Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!
Comunicado Parlamentario Marco Berlis (MEP)