Boneiru tin un bos na Nashonnan Uní

Bonaire Human Rights Organization (BHRO), Davika Bissessar i James Finies di Nos Kier Boneiru Bèk (NKBB), a konkluí un bishita produktivo na Sede di Nashonnan Uní na New York, Estadonan Uní, partisipando den reunionnan kaminda ku e Komité a otorgá Bonaire Human Rights Organization e Status Konsultativo Spesial den e Konseho Ekonómiko i Sosial di Nashonnan Uní. Un momento historiko pa Boneiru.

E bishita a fortifiká e tres ophetivonan di e organisashon: 1) un bos fuerte di Sosiedat Sivil di Boneiru; 2) e pueblo di Boneiru su trayektoria, su ruta, pa pone Boneiru bèk riba Lista di Teritorionan-Sin-Propio-Gobernashon di Nashonnan Uní i, 3) presentashon di keho kombiná pa na e Sekretario-General di Nashonnan Uní, Antonio Guterres. Den e ophetivo number 3 akí, e keho na e Sekreatrio General, Movementu Pa Kambio (MPK) a djòin Bonaire Human Rights Organization (BHRO). 

Ta eksistí un relashon largu entre sosiedat sivil i Nashonnan Uní, ku ta un di e pilarnan di e gran institushon akí, ku nashonnan di mundu a krea na 1945, despues di segunda gera mundial ku 80 mion hende a muri, ku e promesa na humanidat ku ningun pueblo o nashon, grandi o chikí, por ta inferior òf dependiente di otro i mester ta liber i igual. Na momentu ku Hulanda tabata bou di okupashon aleman, Reina Wilhelmina di Hulanda, a ripití e sintimentu akí ku vários akshon, inkluso firmando e Charter di Nashonnan Uní. Su palabranan famoso pa nos islanan di Antia Hulandes: “… lo partisipá, ku konfiansa kompletu di outonomia o gobernashon propio i libertat … den e libertat rekuperá ei nan lo por konstruí un futuro nobo i mihó”. 

E tres organisashonnan akí ta uní den e kompromiso pa tene Hulanda responsabel pa violashonnan di derechonan humano inhustifiká na Boneiru, promoviendo e kompromiso mutuo pa protehá derechonan humano básiko i trahando kolektivamente generando konsiensia regional riba desigualdat na Boneiru, inkluyendo hustisia sosial, ekonómiko, polítiko i kultural.

Siendo riba e Lista di Teritorionan-Sin-Propio-Gobernashon di Nashonnan Uní, di akuerdo ku artíkulo 73, lo stimulá Boneiru su desaroyo Sosial, Ekonómiko, Edukashonal, Kultural i Polítiko, pa motibu ku Hulanda (gobièrnu hulandes) lo tin e obligashon pa reportá anualmente na e Sekretario-General di Nashonnan Uní. 

Durante BHRO su bishita na Nashonnan Uní a reuní tambe ku vários Embahador di Nashonnan Uní i presentá e “Evaluashon di (e grado di) Sufisiensia di Propio-Gobernashon konforme standardnan internashonalmente rekonosé: Pais Boneiru”. BHRO ta reiterá su kompromiso miéntras ta kontinuá ku e mishon di konsientisashon di mas ku 430 dia huntu ku MPK lo kontinuá pa fortalesé asosiashon pa defendé balornan demokrátiko komun, miéntras ta kreando un futuro mas próspero pa e pueblo boneriano.